Si nos tene cuenta con for di principio di mundo maldad a cuminsa, y con maldad a avansa, y con maldad kier domina , nos mester realisa cual Hesus a bisa den Mateo 13:36-43 y pone enfasis riba Mateo 13:38-39 bisando: E cunucu ta e mundo, y e bon simia ta e yuinan di e reino, y e yerba shimaron ta e yuinan di e malbado . E enemigo cu a sembra nan ta e diabel, y e cosecha ta e fin di mundo, y e cosechadornan ta e angelnan.
Diabel no crea nada, e no tin yiu natural, pero e tin hopi cu ta biba bao di su influencia, y cu a tuma maldad haci nan naturalesa, mescos cu diabel ta malo y mentiroso for di un principio.
Tin hopi hende cu no kier tende, pa motibo di nan orguyo y arogancia, pero na nan comportacion y nan defensa di maldad y inmoralidad, bo ta mira cla bao di cual influencia nan ta biba.
Riba e mundo aki tin dos reino, esun di Dios, y esun di diabel, esun di claridad, y esun di scuridad, esun di amor y esun di destruccion.
Pero tur hende tin boluntad liber pa scohe na cual reino nan kier pertenece, si bo scohe pa e reino di scuridad cual ta di e diabel lo bo termina den fierno , den un morto eterno, pero si bo scohe pa Cristo Hesus lo bo ricibi bida eterna y lo ta semper huntu cu Cristo Hesus. Juan 14:1-4).
E diabel ta disfrasa na angel di luz, e ta drenta tur caminda, pero no pa haci bon , pero pa haci malo, pa danja cos, pasobra no tin nada bon den dje, y na e momento oportuno e saca su hunja, y pesey bo ta tende hopi biaha con un hende cu bo tabata pensa cu ta hende bon ta haci malo y hopi biaha cosnan bergonsoso.
Ta masha peligroso, purba cana den dos caminda, pasobra nunca e lo sali bon, bo no por come for di mesa di Dios y mesa di diabel na mesun momento.
No laga nos lubida esaki: Juan 1:10-13 bisando:
E tabata den mundo, y e mundo a wordo traha door di dj’E y e mundo no tabata conos’E. E a bin serca esnan cu tabata di dj’E y esnan cu tabata di dj’E no a ricibi’E.
Ma tur esnan cu a ricibi’E na nan E a duna e derecho pa bira yuinan di Dios, esnan cu ta kere den Su nomber,cu no a nace di sanger,ni di boluntad di carni, ni di e boluntad di hende, ma di Dios.
1 Juan 3:8 ta para scirbi: Esun cu ta pratica pica ta di diabel,pasobra diabel ta haci pica for di principio. E Yiu di Dios a parese , pa e proposito aki, pa E destrui e obranan di diabel.
1 Juan 3:10 ta recorda nos bisando: Na esaki e yuinan di Dios, y e yuinan di diabel ta conoci: esun cu no ta practica husticia no ta di Dios,ni esun cu no ta stima su ruman.
Bisti e armadura completo di Dios, pa boso por para firme contra e trampanan di diabel.(Efesionan 6:11).
Tur locual nos ta mira cu ta pasando actualmente riba e mundo aki tin hopi envolvimento di diabel den dje, e uso di droga y alcohol, e malicia y inmoralidad, tur ta demostra na nos e presencia diabolico cu kier domina .
Pesey laga nos tur hala serca Cristo Hesus,
Sinceramente, Pastor Marcel Balootje
