Ricardo Croes a bira un sumpiña den wowo di esnan cu a kere cu Gobierno lo cay

0
1747

Periodistanan di AVP a haya baño di awa friu

Ricardo Croes a bira un sumpiña den wowo di esnan cu a kere cu Gobierno lo cay

Nan no por verwerk ainda e retiro di Marisol

Desde diahuebs atardi,  Parlamentario Ricardo Croes a bira e persona di mas comenta den boca di opositornan ( lesa AVP),  kendenan ya tabatin botter di champagna pa celebra caida di Gobierno.

Desde cu Parlamento di Aruba,  dia 15 di October a trata un mocion di desconfiansa contra Marisol Lopes Tromp,  unda Ricardo Croes a bandona sala di parlamento,  tur cos tabata mustra cu tin un impase den coalicion di MEP-RED-POR. 

Mesora a cuminsa un campaña agresivo di opositornan ( AVP), unda a gasta masha hopi tempo pa busca tur sorti experto,  haci tur sorti entrevista.  

Hasta politiconan morto a resusita, pa cuminsa prepara pa campaña,  ya cu tur cos tabata mustra cu e impase aki lo no wordo supera.

Gobierno di Aruba y Promer Minister di Aruba, cu tambe a constata e polemica riba e mocion,  unda ta cuestiona su legalidad,  a dicidi e ora, pa busca un otro caminda.    E mocion pues no a wordo considera mas pa retira Marisol,  pero a cuminza e proceso for di Conseho di Minister. 

Den conseho di minister,  6 Minster a firma di no por traha cu Marisol.  Rudy Lampe a abstene!  Marisol no a acudi na e reunion y ta logico cu Marisol lo no firma e decision ey.

Na un forma legal a manda e retiro pa Gobernador,  kende na su turno a pidi Staten pa duna nan sentimento.  Den un reunion di comicion central,  MEP, POR y RED a sostene e decision di Conseho di Minister,  maske cu diparti RED nan ta bisa cu nan no tin problema cu Marisol,  pero na mes momento nan ta sostene e mayoria den coalicion cu si tin problema.

Esaki pues a resulta e ora cu Gobernador a bay over na duna Marisol su retiro. 

E hecho aki a laga algun opositor y prensa na yoramento.  Nan a dedica un siman pa crea tur sorto di instigacion, tur sorto di discordia,  y tur sorto di redo, pa na final nan para wak con nan ilucion di caida di gobierno no a cristalisa.

Mas cu claro esaki a produci poco rabia den nan curpa unda nan a cuminsa saca nan gal riba Ricardo Croes, tirando tur sorto di palabra den su direccion.

Nos ta conclui cu Ricardo Croes a keda consistente na tur momento y el’a declara tambe cu su persona no tin probelma cu Marisol y su sosten na e retiro ta mas bien basa cu e ta uni su mes na e mayoria di coalicion, unda tin 10 eybanda cu si tin un problema cu Marisol.

Pues, laga nos splica un bes mas cu e mocion di parlamento cu a wordo tanto cuestiona, NO  a wordo usa pa retira Marisol y netamente pa evita polemica.   A usa un otro proceso den ley,  unda a retira Marisol.  

Nos ta kere cu opositornan y prensa asocia na AVP a haya un baño di awa frieu y nunca a kere of a biba pensa cu Prome Minsiter di Aruba lo cana un otro caminda.  Es mas, ni Marisol a pensa esaki,  pasobra ainda e tabata reta Prome Minister pa manda e mocion pa Gobernador,  y no a pensa cu lo por retire na otro forma.  

LEAVE A REPLY

Please enter your comment!
Please enter your name here