ORANJESTAD – Durante e ‘Conferencia 35 aña Status Aparte – Aruba Ta di Nos Tur’, Gobierno di Aruba a ricibi tambe un bunita mensahe di Sr. Robby Beukenboom, ex-mandatario di Boneiro.
Den su mensahe e ex-mandatario di Boneiro a expresa palabra di felicitacion pa tur arubiano pa e 35 aña di Status Aparte. Sr. Beukenboom a bisa cu autonomia y gobernacion propio ta algo sagrado. E ex-mandatario a trece dilanti cu Pais Aruba a pasa den hopi retonan ultimo 35 aña, cual no tabata facil pa e pueblo Arubano, manera entre otro ceramento di a refineria, CAFT, pandemia, COHO y Landspakket. ‘E unico manera cu Aruba por a surpasa e retonan aki ta door di union di arubianonan cu ta orguyoso di nan Pais y hunto boso tur lo por logra esaki’, tabata palabranan di Sr. Robby Beukenboom, un gran amigo di Pais Aruba.
