Ta pesey mes nunca Sport subsidiecommisse, federacionnan di deporte y deportistanan na Aruba no por a haya nan ‘fair share’ den subsidio di deporte, pasobra ni Departamento di Impuesto mes a haya su ‘fair share’ serca Roland Tuitt, director retira for di Fundacion Lotto pa Deporte. Ta insolito pasobra aki ta trata di un fundacion netamente di gobierno.Roland Studley Tuitt un ex Certified Public Acountant (CPA) y ex register acountant (RA) a kere cu e ta Mago Harry Houdini den evadi belasting. Tuitt a wordo busca pa investiga e director anterior Wernet y e la probecha pa hasi su mes director di Lotto pa Deporte. Apesar cu Tuitt como persona natural tawata inscribi na Camara di Comercio como e unico director di Lotto pa Deporte e la paga su mes salarionan y otro beneficionnan na su compañia di acountant cu manipulativamente llama R.S. Tuitt CPA N.V sin retene loonbelasting ni primanan social.Tuitt kier a hasi manera cu ta consultant e ta di Lotto pa Deporte lubidando si cu su negoshi di acountant tawata tin unicamente e fundacion di Lotto como cliente. E modus operandus tawata paga salario y beneficionnan na su propio NV sin paga nada di loonbelasting ni primanan social y despues bisa cu ta su NV a haya entrada di consultant for di Lotto, pa asina paga e tarifa abou di winstbelasting di 25%. E pret ta cu Tuitt como nep consultant tawata core si den auto di trabou di Lotto pa Deporte sin paga belasting tampoco riba e uso priva.Aya banda, un comerciante ta puntra su mes con tur esey por tawata posibel, mirando cu un oficina di acountant conoci a controla e bukinan di Lotto pa Deporte. Hasta e oficina aki a aproba jaarrekeningnan di Lotto pa Deporte. Pa hasi e caso mas complica ta e mesun oficina aki su expertonan di belasting a investiga Tuitt pa cu e asunto di evadi impuesto. Tambe un fiscalista/hurista di e oficina aki a yuda Lotto pa Deporte bringa Tuitt den corte. Imaginabo cu aki na Aruba si tin hopi Mago Houdini.
