Cu mas di dos decada di carera den musica, Romeo Santos ta un di e artistanan cu no ta warda nada ora e ta den cualke situacion. Su entrega ta incuestionabel, pa e motibo aki ta comprendibel su reaccion contra e organizadornan di su conciertonan mas reciente na Aruba y Venezuela.
E artista mericano di sanger dominicano a presenta den e paisnan aki dilanti di un stadion yen, unda su siguidonan mester a warda te casi 5or di mainta pa mira nan idolo canta, algo cu manera por a spera, a genera moleser y a converti’e den tendencia riba rednan social.
Su splicacion na Venezuela:
“Ayera mi a subi e stage pa 4’or di mainta, mescos cu awe, pa un situacion cu ta envolvi e mesun compania cu a organisa e evento aki”, Romeo a bisa na Venezuela e motibo di su tardanza den subi stage.
El a bisa cu tur cos tabata pa mal organisacion di parti di e productornan di e show.
El a agrega: “un iresponsabilidad y un falta di respet pa boso, e publico, pa mi musicanan, mi tecniconan y e servidor aki”.
“Mi tin 26 aña di trabao, nan por google, nan por documenta, nan por informa esnan cu no sa mi reputacion. Mi no a falta di respet pa mi publico, nunca mi a yega laat”, el a agrega entre gritonan di aprobacion y reproche di e asistentenan, manera ta den un video viral.
