Rory van Ulft y Ettel Boyce na caminda pa Campeonato Panamericano y Suramericano di Weightlifting na Guayaquil, Ecuador

Aruba Amateur Weightlifting Association (AAWA) ta anuncia cu dos atleta femenino lo ta participando den e proximo Campeonato Panamericano Prehubenil (Sub-15 y Sub-17) y Campeonato Suramericano (Sub-15, Sub-17, Sub-20 y Mayores) di Weightlifting, cu lo tuma lugar na Guayaquil, Ecuador, for di 24 pa 31 augustus 2026.

E torneo aki ta e prome evento clasificatorio pa Weganan Panamericano di Lima 2027, loke ta haci’e un evento di gran importancia den e calendario deportivo internacional.

Atletanan Rory y Ettel

Team Aruba ta consisti di Aurora (Rory) van Ulft, cu ta competi den categoria di 45kg, division Sub-15 y Sub-17, y Ettel Boyce, cu ta competi den categoria di 61kg, division Mayores (Senior). 

Rory ta yega Guayaquil como Campeon Mundial Hubenil. Recientemente, Rory a competi contra ocho pesista di rond mundo y a bira Campeon Mundial den tur tres disciplina, cu un resultado oficial di snatch 69kg, clean and jerk 93kg (Record Mundial) y un total di 162kg (Record Mundial). 

Ettel ta bolbe competi despues di su participacion na e Campeonato Panamericano di Mayores na Panama, unda den categoria di 58kg, el a logra un snatch di 53kg y un clean and jerk di 70kg, pa un total di 123kg.

E delegacion lo ta guia pa Michael Bareño, delegado di AAWA y coach di Ettel. Tambe lo tey Spencer Moorman y Cavan van Ulft, coachnan di Rory.

Competencia

E competencia lo tuma lugar na e José Desimavilla Arena, Guayaquil, bou auspicio di e Federacion Panamericana di Levantamiento di Pesas y e Confederacion Suramericana, y segun e reglanan tecnico di e International Weightlifting Federation (IWF).

Cu Rory como Campeon Mundial Hubenil, y Ettel den bon forma despues di su ultimo competencia, AAWA tin gran speransa pa e delegacion den e competencia grandi aki.
Rory lo ta compitiendo diaranson 26 di augustus pa 11or di mainta den categoria di 45kg femenino. Despues, diabierna 28 di augustus, lo toca turno pa Ettel competi den categoria 61kg femenino.

Gradicimento

AAWA ta gradici Stichting Sportsubsidie Aruba, Lotto pa Deporte y e Comite Olímpico Arubano, pa nan apoyo grandi na Team Aruba Weightlifting pa e campeonato aki.

Pa mas informacion, por fabor tuma contacto cu: Aruba Amateur Weightlifting Association (AAWA) na directiva@arubaweightlifting.org