Dialuna awo, 2 di maart, lo tin otro Rosario Bibo na kapel di Alto Vista pa 7 or y mey di anochi.
Nos ta den temporada di Cuaresma y ta bon pa reflexiona tocante nos bida como Cristian y e relacion cu bo prohimo.
Por pensa riba e cuido di nos grandinan, e atencion cu nos ta duna nos muchanan y nos hobennan, e relacion cu coleganan na trabou etc.
Durante e Rosario Bibo, cada un por presenta su intencion personal of general. Hunto lo resa pa paz den cada cas, pa nos isla y mundo henter.
Na caminda pa e fiesta mas grandi di Iglesia Catolico, esta Resureccion di Hesus, cada persona ta keda invita pa prepara su mes spiritualmente pa participa den pasion, morto y resureccion di Cristo. Participa na un caminda di cruz ta un forma pa reflexiona riba e sufrimento cu Cristo a pasa pa nos picanan.
Un y tur ta keda invita pa participa na otro Rosario Bibo dialuna awo, 2 di maart pa 7 or y mey di anochi na kapel di Alto Vista.
Na nomber di comision
Nilda Koolman
27 di februari 2026
