Diahuebs merdia, Prome Minister mr. Mike Eman, hunto cu Minister di Infrastructura drs. Rene Herdé y Minister di Turismo mr. Wendrick Cicilia a asisti na un ceremonia riba Rotonde Las Americas dilanti di Cas di Cultura relaciona cu e proyecto di reforestacion y di renobacion di cuidad. Despues di algun tempo cu ta renobando e rotonde aki, a toca turno pa embeyece esaki cu un gran cantidad di mata.
Rotonde Las Americas ta un di e puntonan importante riba e ruta entre aeropuerto y e area hotelero na unda gran cantidad di auto ta pasa tur dia. Den pasado e rotonde aki tabatin un fontein grandi pero cu tempo a elimina esaki pa motibo di e gastonan halto di mantencion. Despues e rotonde a haya un facelift minimo y awo a toca turno pa renoba esaki completamente. E renobacion ta inclui un diseño moderno y atractivo y ta inclui un variedad di mata nativo y naturalisa cu, hunto cu otro mehoracion, lo mester contribui na elevacion di nos producto Aruba. Total a planta 176 mata riba e rotonde aki cu ta inclui e mata nan nativo manera Fofoti, Pal’i Sia Cora, Raspa Cora, y Raspa Biña, y algun otro variedad naturalisa na Aruba manera e Flamboyan y e Oleander di Boneiro.
Prome Minister Eman, encarga cu e proyecto nacional di reforestacion, kier trece matanan nativo bek den nan area natural y haci di Aruba un isla berde yena cu matanan local. Ademas e gran cantidad di mata cu kier planta tur caminda, lo cu tempo crea sombra cu na su turno tambe lo mehora e clima localmente.
Prome Minister a gradici DOW y Fantastic Garden pa nan sosten, pero tambe ATA pa nan sosten financiero. Ademas a gradici esnan cu ta traha banda di caminda cu tin e tarea pa cuida y mantene e area limpi.
