Diaranson pasa, dia 7 di juli, Royal Aruba Aloe orguyosamente a habri su portanan pa Secretario di estado sr. Raymond Knops, y un delegacion di VNO Aruba. E ocasion aki a marca e prome bishita di e Secretario di estado na Royal Aruba Aloe, kende a expresa di tin interes den bishita e compania cu receintemente a ricibi un predicado “Real” ariba dia 22 di april, 2021.
E predicado Real ta simbolisa respet, aprecio y confiansa di Su Mahestad pa e organisacion cu ta ricibi’e. Cu e predicado Real, Royal Aruba Aloe ta e prome compania den e parti Caribense di Reino Hulandes cu ta forma parti di un grupo di compania manera Shell, KLM, KPN y e Royal Shiphol Group, pa menciona algun ehemplo.
E Secretario di Estado a wordo ricibi door di sr. Koos Veel, “Director of Operations” y Jossy Laclé, Presidente di hunta di Directiva na Royal Aruba Aloe. Despues e Tour Guide di Royal Aruba Aloe, Denrick Lopez, a duna e grupo un splicacion extenso tocante di e mata di Aloe y su historia ariba nos isla. Despues el a guia nan door di Royal Aruba Aloe su museo y a mustranan nan fabrica “state-of-the-art” cu nan tin na Hato, cual berdaderamente a impresiona e Secretario di Estado.
Continuando cu e bishita, Aruba Aloe su “Director of Operations”, Koos Veel, a splica mas tocante di e historia di e compania. Naturalmente, Royal Aruba Aloe tambe a expresa su gratitud pa e ayudo cu Hulanda a provee durente e lunanan dificil di Covid ora cu tur e tiendanan di e compania tabata cera. Afortunadamente e compania a logra di surpasa e tempo dificilnan aki y mantene tur su empleadonan den servicio. Sr. Koos Veel a menciona tambe orguyosamente cu e compania ta operando normal atrobe y no mester di subsidio mas pa por paga salario di su empleadonan.
Sr. Veel tabata tin algun palabra pa comparti tocante di e bishita: “Nos ta honra cu Royal Aruba Aloe a haña bishita di e Secretario di estado Sr. Knops. Specialmente nos ta orguyoso di por a comparti con Royal Aruba Aloe a logra haña su pedicado “Real”.”
Royal Aruba Aloe, cual a wordo estableci na 1890, ta e prome compania den e parti Caribense di Reino Hulandes cu a wordo otorga un predicado Real y ta un di e poco companianan di Aloe na mundo cu ta crece, cosecha y procesa su Aloe na e mesun lugar. E Aloe, cual ta wordo considera e miho Aloe di mundo, ta e base di un coleccion di producto pa cuido pa cuero, solo y cabey, cual constantemente ta creciendo. Royal Aruba Aloe awor aki tin 16 tienda aki na Aruba, y su productonan ta obtenibel pa wordo cumpra ariba www.arubaaloe.com (Merca & Canada) y na www.arubaaloe.nl (Europa).
