Oranjestad – Parlamentarionan di FUTURO, Ruthlyn Lindor y Muzanin Wever, a lanza un alerta urgente durante un rueda di prensa: “No tin nigun base legal pa paga subsidio sin landsbesluit.” Nan a exigi cu minister Gerlien Croes stop TUR pagonan di SUBSIDIO inmediatamente na institucionnan cu no tin e documentacion rekeri, ya cu esaki ta violacion di ley y ta incorecto.
E Problema: Subsidio paga na institucionnan sin beschikking
Segun Wever y Lindor, “ta imposibel cu institucion ta sigui ricibiendo placa di gobierno sin un beschikking of landsbesluit.” “Aunke un proceso ta complica, e ta segun ley” “Como minister bo no por omzeil e reglanan”. “Ni si e ta dura largo”. E situacion aki no ta limita na ASU; tambe e ta afectando 42 otro fundacion of institucion cu actualmente ta hayando subsidio sin e documentacion necesario.
Pero e critica mas fuerte a bin contra ex-minister Endy Croes, cu segun nan, “no a garantisa e transparencia i legalidad durante su trabao.” Sin embargo, e pregunta cu ta bini: Gerlien Croes ta permitiendo e mesun error cu e pagonan di subsidio di April, Mei, Juni y Juli 2025? E 4 lunanan cu e ta den gobierno, cu tampoco e institucionnan tin beschikking, nan ta cobrando? Of a laga stop nan per direct?
Gerlien Croes lo tene su mes na su palabra ?
Lindor y Wever a pone e minister den un situacion dificil: “Si e kier ta corecto, e mester actua conforme su discurso.” Stop tur subsidio ilegal, no solamente esun cu ta conveni. Nan ta puntra claramente: Lo e minister ta keda consistente i stop tur pagonan irregular, of lo e sigui paga algun mientras e ta critica su predecesor?
E reto legal pa Gerlien y Futuro: ta paga of ta stop?
E problema aki no ta simpel: Si Gerlien Croes stop tur subsidio sin documentacion, varios institucion lo keda sin financiamento. Si e sigui paga, e ta contribui na un sistema irregular, incorecto. DWJZ a yama esaki un “bestendig praktijk”, algo conoci caba pa algun aña. E yamado di Wever y Lindor ta pone Gerlien Croes den un posicion delicado: of e ta cumpli cu su palabra i actua consequente, of e ta keda practica e mesun critica cu e ta haci na su antecesor.
