Miembronan di Scouting Aruba tabata hopi activo den e ultimo simannan aki cu varios bunita actividad. Entre otro nan a marcha den parada pa Dia di Rey. Prome cu esey tabatin gruponan campando y e gruponan cu a bin hunto bek despues di e vakantie di Pasco Grandi.
Pero, e “high light” den Scouting Aruba tabata e dos hobennan explorer Phelan Tromp y Rashid Ruiz cu a cumpli cu hopi exigencia varia hopi duro y exigente pa nan edad y nan carera den scouting, core tanto kilometer, cana tanto kilometer, traha nan mesun luga di drumi, cushina nan mesun cuminda y hopi hopi mas. Den awasero of den solo, durante dia y anochi e dos hobennan aki tabata trahando duro riba nan Kroon Explorer Insigne locual nan a logra tambe. Esaki t’e Insigne di mas halto den e mundo di Scouting. Y tur esaki bao supervision y participacion di lider scout Hopman Timothy Lake y Hopman Chikai Rudolf Angela, pasobra como cu e dos hobennan no tin 18 aña ainda, nan so no tabata mag di a haci tur cos, manera keda drumi den mondi ni cana of core bicicleta nan so, pasobra ta trata di 20 of 30 km of mas.
Henter e ruta, varia riba diferente luga riba nos isla, Hopman Chikai a bay cu nan. E tambe a cana y core mescos cu Phelan y Rashid, pues haci tur cos cu nan mester a haci, pasobra Phelan y Rashid ta “minderjarig” ainda. Hopman Timothy Lake tabata guia y controla e proceso, pasa regularmente controla si nan tabata cumpliendo cu nan eisennan pa despues entrega tur verslag cerca HC Chief Scout Christopher “Chris” Lake cu a confirma tur e “eisennan”, tur cos a cana bon manera mester ta.
Scouting Aruba ta haya dos Kroon Explorer despues di 25 aña. E cherry riba e bolo ta cu e dos hobennan aki a haya e premio di estimulo Felipe B. Tromp 2025 pa stimula mas hoben bay pa nan Kroon Explorer Insigne. E ta hopi pero cu diciplina, bon planificacion y perseverancia tur hoben por logra. E logronan aki ta un bunita clausura pa nos HC saliente cu despues di 6 aña di trabao super bon, excelente ehecuta pa su persona, e gentil cabayero Christopher “Chris” Lake ta entrega su puesto di HC (Hoofd Commisaris) bek na directiva di Scouting Aruba pasobra a yega tempo pa un otro subi y e puesto lo wordo tuma pa un otro gentil cabayero John Hessen cu ya a ocupa e funcion ey den pasado, tambe profesional cu curason. Nos ta comparti un poema cu nos a inspira pa HC Chris Lake:
H oofd Commisaris na cabes di SA
C u capacidad profesional y bon curason
C u seriedad pero semper cu un sonrisa cu ta inspira
H opi bever, welp, verkenner, explorer y lider scout ta admir’e
R uman scout balente, sincero y puro ta den dje
I Lady Ruth como lider Bubbels di grupo scout Kimball O’Hara
S emper cu admiracion y respet hasta despues di bo termino di 6 aña
L eu bo lo no ta nunca, Aruba bo cas ta aki mes
A dmiracion, gradicimento y amor di ruman scout pa bo cada bes
K u nos topa’bo of wak bo potret di cualkier actividad
E bendicionnan, alegria y satisfaccion di mes ta celebra bo felicidad y logronan alcansa tur dia
DANKI H.C. CHRIS LAKE , Wij zullen doorzetten onder alle omstandigheden!
Pabien na nos dos Kroon Explorer Phelan Tromp y Rashid Ruiz y danki un biaha mas na HC Chris Lake pa tur tur cos cu el a haci y cumpli cu ne profesionalmente cu curason!
Danki pa lesa nos relato, un “bearhug” di Ruthy ”Lady Ruth”.
