El’a critica liderasgo di Mike Eman fuertmente pa uno di cobardia, falta di integridad y dispuesto pa gaña pueblo
Politico y parlamentario di AVP, Sr. Rycond Santos a emiti un comunicado basta fuerte den direccion di Partido AVP, unda e ta cuestiona e partido den un forma hamas antes bisto.
El’a cuestiona cu AVP ta brasa corupcion, falta di integridad y si AVP no reforma, e no por haya confiansa di pueblo pa goberna e pais atrobe.
El’a basa su mes fuertmente riba liderasgo di partido, cu ta uno di silencio y cobardia. Te hasta cu e actitud ey, ta dispuesto pa gaña pueblo.
Rycond a baha pisa riba Paul Croes y Benny Sevinger. Tambe riba e hecho cu Partido a ataca ministerio publico y kier a punta dede riba Sra. Evelyn Wever Croes.
Den un solo palabra: Rycond a sacudi e fundeshi di AVP, manera temblor!
Den tur skina por a sinti e temblor Rycond diamars, na apertura di e siman unda lo cay un sentencia riba partido AVP pa corupcion.
Rycond a haci yamada pa sigui e pasonan di Mito Croes, cu a bini cu rapport Calidad.
El’a bisa cu ni cuanto yamada haci pa subi caya, cu slogan pa “Salba Aruba”, esey ta nada mas cu gritonan pa poder y oportunismo politico.
E ta boga pa integridad den e partido y si no bin integridad, e partido no mag goberna Aruba.
