Periodismo etico a bira mas actual cu nunca, despues di e incidente cu a tuma luga diabierna dia 3 di januari 2025, unda e yiu di Endy a agredi Speed den un hanchi banda di Bohemian restaurant. Tin hopi angulo pa analisa e sucedido aki, pero den tur scenario nos mester reconoce cu 24ora ta e plataforma di mas grandi, poniendo un responsabilidad mas pisa riba lomba di Mark, Patrick cu Speed. Esey kiermen cu na momento cu tin un conflicto entre Endy y Edmond na un banda y Patrick cu Speed na e otro, e responsabilidad pa desescala e situacion ta pisa mas pisa riba schouder di Patrick cu Speed. P’esey e ta grave cu Patrick no ta dispuesto pa stop e bullying y solamente kier bay un tiki mas suave. Ta comosifuera cu Patrick no ta worry cu si e pusha palo bao di un conflicto verbal, e chens ta grandi cu e conflicto ta escala y coy mas candela. P’esey nos ta scucha den pueblo ta bisa cu Patrick mes ta busca un wanta.
Naturalmente pueblo ta compronde cu cada un di nos ta carga responsabilidad pa loke nos mes ta haci. Esey ta conta pa e yiu di Endy tambe. E responsabilidad ey ta conta mas ainda si bo ta practica cualkier deporte di combate, manera e yiu di Endy. Pero, tambe ta importante pa reconoce cu e emocion profundo cu ta crece cerca un yiu ora cu e ta mira un conflicto verbal prolonga, unda cu hende ta papia yen soketada di su famia, ta fomenta un sentimento di impotencia pa cu e inhusticia di e situacion. Hopi biaha e sentimento ey ta escala na violencia fisico. Pero e violencia aki no ta resolve e atake riba e dignidad di bo sernan keri. Mas bien e ta empeora e situacion, pasobra violencia ta atacha e dignidad y integridad fisico di un otro ser humano. Esey ta hiba nos pais den un abismo mas profundo. P’esey ta miho pa nos fomenta un cultura cu ta reconoce e dignidad di cada persona y periodismo etico tin un rol importante pa realisa e cultura di respet ey.
