29 augustus 2024
Speed y Patrick no ta periodista real
Dia 27 di augustus 2024, durante Enfoke, Speed y Patrick a bolbe dirigi nan atake contra mi. E biaha aki nan a sinti nan mes provoca pa un articulo cu mi a skirbi e dia ey, titula “Corupcion cu traspaso di permiso di taxi”. Nan a sinti nan mes desenmascara cu e sigiuente palabranan di e texto: “AVP a bin ta pusha e storia cu e maneho di Ursell pa cu e traspaso di permiso di taxi no tin pia ni cabes. Su medionan di comunicacion a yuda plama e pelicula di teror aki.” Obviamente e sapato a fit. Berdad ta pica lenga…
E realidad ta cu Speed ta stima AVP mata. Tur hende sa di e lasonan entre Mike Eman y e duo comico Speed cu Patrick. Di basta tempo nan ta yuda AVP mina nos estado di derecho, normalisa criminalidad y atacha e credibilidad di Ministerio Publico. P’esey e no ta sorprende cu e ta molestia nan cu mi ta defende nos estado di derecho y nos cadena hudicial.
E tambe ta dificil pa nan acepta cu mi ta denuncia nan falta di integridad periodistico. Nan no ta respeta e codigo di conducta internacional di periodismo, conoci como e Carta Etica Mundial pa Periodista, cu tin como prome regla: “respet pa e hechonan y pa e derecho di e publico haya e berdad”. Nan falta di etica ta particularmente evidente den e manera con nan ta troce e casonan di corupcion di e ministernan di AVP, Paul Croes y Benny Sevinger. Djis scucha Enfoke di dia 4 di april 2024.
Speed ta mina nos estado di derecho
Mi denuncia di nan falta di integridad periodistico no tabatin mucho efecto. Esey no ta nada straño, pasobra Speed tampoco a siña su les despues di su condena penal na 2019. Su condena penal pa actonan cu el a comete como supuesto “periodista” ta afecta su credibilidad y ta pone un nubia scur riba e profesion di periodista na Aruba. Como convicto su atakenan constante riba nos sistema hudicial ta parce di ta un expresion di rencor en bes di un deseo pa busca e berdad.
Ademas di ta troce berdad, Speed tambe ta mustra poco respet pa e norma di conducta cu ta stipula cu un periodista mester uza solamente metodonan honesto pa obtene informacion. Su condena di 2019 ta demostra cu Speed no tin ningun problema pa comete delitonan pa obtene e informacion cu e kier.
Speed tin un strafblad pa prueba cu e si tin caya
Durante Enfoke di dia 27 di augustus 2024, Speed y Patrick a ripiti nan critica cu mi no tin “caya”. Nan tin rason. Es mas, Speed sin duda tin “caya” y e tin un sentencia criminal pa prueba esey.
Dia 15 di juli 2019, tres caso penal a resulta den sentencianan cu ta subraya e necesidad di integridad y responsabilidad tanto den periodismo como den e funcion policial. Ta trata di e casonan di Speed, su empleado Marko y e agente policial Kenneth (cu bo por busca bao di e referencianan: ECLI:NL:OGEAA:2019:455, ECLI:NL:OGEAA:2019:457 y ECLI:NL:OGEAA:2019:458).
Speed a wordo declara culpable pa e delito di encubrimento intencional (opzetheling), incluyendo un radiotransmisor policial, y e crimen di intercepta ilegalmente comunicacion policial. Pa e delitonan aki, Speed a ricibi un condena condicional di dos luna di prizon, hunto cu un periodo di prueba di tres aña, y 240 hora di servicio comunitario. Aparentemente su actonan tabata motiva pa e deseo di ganashi financiero y e deseo pa haya un bentaha inhusto riba e competencia di 24ora. El a uza radio di polis den forma ilegal pa ta e prome den noticia. E prome cu tabata sa di accident, crimen y otro suceso. Asina e por a transmeti su noticianan mas lihe y genera mas placa door di bende anuncio. Loke nos sa sigur ta cu Speed tabata duna ordo na su trahado Marko, cu den e contexto aki tambe a wordo declara culpabel di interceptacion ilegal. Finalmente, Speed a corumpi Kenneth tambe, un agente policial cu pa colmo tabata traha na e Oficina di Integridad y Seguridad di nos Cuerpo Policial. Ta e agente aki a duna e radio na Speed. Danki na Speed Kenneth a haya un condena pa malversacion.
Crimen cu ta mina nos estado di derecho mester wordo combati
E gran cantidad di caso penal na Aruba cu ta involucra politiconan corupto, funcionario corupto y periodista criminal ta subraya e necesidad di maneho cu ta pone enfasis riba integridad y responsabilidad di e politico, e periodista y e polis. E castigonan cu hues a impone ta refleha e gravedad di e delitonan y ta enfatisa e importancia di promove etica den nos sociedad. Sin embargo, e castigonan mester keda un excepcion, y no mag di bira e regla. P’esey e ta esencial cu pa nos haci integridad parti central di maneho, incluso maneho di transporte y di taxi. Como sociedad, nos mester exigi norma mas halto di integridad di nos polis, periodista, politico, taxista y ciudadano en general.
