Arubaanse Voetbal Bond (AVB) ta anuncia cu e momento a yega pa e gran final den e categoria Menor (U-15) ORO. E dos gigantenan, S.V. Britannia y S.V. R.C.A., lo topa otro cara a cara pa dicidi ken lo bira e campeon nobo di futbol di Aruba den e categoria aki.
Despues di un campeonato exitoso, e dos ekiponan aki a logra avansa pa e gran final, primintindo un partido yen di emocion y talento hoben riba tereno di wega.
Detayenan di e partido
E gran cita lo tuma lugar riba e siguiente fecha y orario:
- Dia: Diadomingo
- Fecha: 3 di Mei 2026
- Ora: 9:00 AM
- Wega: S.V. Britannia vs S.V. R.C.A.
- Tereno: Centro Deportivo Frans Figaroa (CDGT)
Reglanan y protocol di final
AVB a stipula algun punto importante pa garantisa e bon transcurso di e final:
- Desicion pa Penal: Si e partido keda empata despues di e tempo reglamentario, lo no tin tempo extra. Lo pasa mesora pa tironan penal (5 pa cada ekipo) te ora tin un ganador.
- Protocol di Inicio: E hungadonan lo sali riba tereno acompaña pa e Himno di FIFA, sigui pa e Himno di Aruba.
- Organisacion riba Banki: Cada ekipo por tin un maximo di 5 persona adulto riba banki (entrenador, asistent, masahista, lider di ekipo y un persona extra).
- Cooling-Break: E referee lo dicidi si mester di un pausa pa hidratacion durante e partido.
Informacion pa e fanaticada
E fanaticonan di ambos ekipo por uza e tribuna parti ariba (e parti sin dak), caminda AVB lo tin su cashier disponibel. Porta di e stadion lo habri un ora prome cu inicio di e partido, esta pa 8:00 AM. AVB ta pidi tur entrenador pa cuminsa cu e calentamento (warming-up) trempan pa asina e partido por arranca exactamente pa 9:00 AM.
Premiacion
Na final di e partido, AVB lo realisa e ceremonia di premacion. Tanto e ekipo Campeon como e Sub-Campeon lo ricibi:
- 25 Medaya pa e hungadonan y staf.
- 1 Copa como reconocemento pa nan logro den e campeonato aki.
AVB lo tin su fotografo oficial presente pa capta e mihor momentonan di e partido y e alegria di e ceremonia final. Un invitacion ta bay na henter e comunidad di futbol pa bin apoya nos talentonan hoben den e gran final aki.
