Arubaanse Voetbal Bond (AVB) a anuncia oficialmente e gran partido Final di e campeonato LIFIDA-A (U-11) den Categoria Plata. E dos heroenan infantil di S.V. Caiquetio y S.V. RCA a percura pa un temporada espectacular logrando avansa pa e gran final, caminda nan lo disputa e honor maximo pa determina cua ekipo lo bay cu e titulo di CAMPEON di Aruba.
E directiva di AVB a extende un caluroso saludo di exito na tur dos organisacion, reconociendo e gran esfuerso y disciplina presenta pa e hungadonan, Cuerpo Tecnico y fanaticada pa yega te na e etapa culminante aki di e torneo.
Detayenan di e Final
E wega decisivo lo tuma lugar e diasabra awor, dia 13 di Juni 2026, pa 9:00 AM riba e tereno links di C.D.G.T. na Dakota. E portanan di e stadion lo habri un ora prome cu e inicio di e partido pa asina facilita e entrada di tur e publico y fanaticada.
Definicion mesora for di punto penal den caso di empate
Basa riba e regla di competicion, AVB a recorda na e clubnan cu si na final di e tempo reglamentario e wega keda empata, lo pasa di biaha pa e tanda di tironan penal (penalty). Esaki lo consisti di un tanda inicial di 5 tiro pa cada ekipo. Den caso cu e empate persisti despues di e prome tanda aki, lo sigui ehecuta e tironan un pa un te na momento cu tin un ganador absoluto.
Puntonan clave pa un bon transcurso di e wega
Pa garantisa un final exitoso den un ambiente deportivo sano y organisa, AVB ta pidi specialmente pa tene cuenta cu e siguiente directivanan:
- Warming-up trempan: Ta pidi na e entrenadornan pa organisa e warm-up di e hungadonan cu anticipacion pa por cuminsa e wega formalmente pa 9:00 AM conforme e orario stipula.
- Fanaticada y Benta di Ticket: E fanaticonan di tur dos ekipo mester uza e tribuna parti ariba (e seccion sin dak), unda e Cashier di AVB lo ta ubica pa e benta di entrada.
- Protocol di Entrada Oficial: E salida di e hungadonan lo ta un momento special, caminda nan lo drenta tereno cu e Himno di FIFA, sigui pa e Himno Nacional di Aruba.
- Personal riba Banki: Cada ekipo por tin un maximo di 5 persona adulto riba banki di reserva (Entrenador, Asistent Entrenador, Masahista, Team Lider y un persona extra).
- Cooling-Break: E Referee principal tin e facultad pa stipula e minuutnan di cooling-break dependiendo di e necesidad y clima pa cuida e salud di e hungadonan.
- Formulario y Carnet: Cada club mester percura pa tin nan carnetnan y e formulario di wega cla y yena na tempo pa e Referee di AVB por hasi su control debido prome cu e wega.
Ceremonia di Clausura y Premacion
AVB lo conta cu su fotograaf oficial pa registra e miho momentonan di e wega y henter e ceremonia di clausura. Den e premiacion final, AVB lo otorga un maximo di 25 medaya y e Copa correspondientes na cada ekipo participante, reconociendo nan bunita logro den e Categoria Plata.
