Skirbi pa Ruthy”Lady Ruth” Vrieswijk-Bergen
Saludos ! A peticion, nos lo purba di inclui un poema den mi relatonan di awor en adelante. E
lector a bisami, cu , den e temponan dificil y crenchi complica aki, un poema ta baha bon. E por
inspira y alivia y of alegra e curason. Mi no sa si mi logra tur biaha, pasobra mi tin cu dal un
sambuya den e programanan riba mi laptop pa wak kiko mi tin warda. Lady Ruth mes a hanja
falta di no por a bay e ultimo “Poetry Night”, den curason di Oranjestad, luna pasa.
Y pa bisa berdad, no tin hopi inspiracion den e tempo di covid aki pa inspira poemanan nobo.
E atencion ta na famia, na nos hogar. Of e inspiracion tey den un skina, pero tapa cu tristeza, ora
tende cu un otro persona stima y bon conosi den nos comunidad mester a bay nos dilanti. Nos a
hasta lubida cu dia prome di September ta Dia di Prensa . Ta riba facebook nos a bin lesa y wak e
postingnan encuanto e dia special aki, pa tur cu ta traha den e ramo aki di informa y re-educa y
of educa nos pueblo. Duna informacionnan concreto, directo y honesto di situacionnan andando
na bienestar di tur. Lady Ruth sa, pasobra e tambe tawata parti di e grupo aki anjanan pasa. Su
prome trabao na Radio Kelkboom y anjanan despues na Radio Carina y despues na Radio
Galactica. Un trabao cu responsabilidad di kiko bo ta type, cu bo impreshonan y of
informacionnan ricibi na por ehempel un conferencia di prensa. Awendia tin hopi caranan hoben
y bunita den prensa. Nos no sa cuanto di nan a sigui curso y of studia periodismo, pero ta spera
cu nan sa nan trabao y dia pa dia gana mas experiencia . Tin cu tin un mihor vocabulario cu otro,
cu sa mas palabra cu otro. Tin hopi di e “biewnan” profeshonal cu ta bon activo keto bay.
Lady Ruth a sigui un curso di journalista hopi anja pasa di un persona di Hulanda, si mi por
corda bon. Un profeshonal di televishon hulandes. Y nos tambe a sigui cursonan di Papiamento
serca e.o. Ernesto Rosenstandt ( awe dfm), Gregorio “Ito” Tromp y Ramon Todd Dandare.
Nos a gusta e trabao den prensa y den radiodifusion. Nos kier a felicita tur cu ta activo den
prensa ainda, pabien pa cu boso bon trabao y sigui asina . Duna tur e bandanan di medaya pa
pueblo comprende mihor, pensa y saca nan conclusion. Mi ta buscando un poema pa e relato aki,
pero no por hanja ainda. Mucho cos riba mi laptop. Cuatro nomber cu ta bini na mente, di e
grandinan cu no tey mas, ta, Jos van der Schoot, Jossy Mansur, Janchi Tromp y Carlos”
Cayochi” Kelkboom. Hopi a sigui den nan pasonan ehemplar. Algun di e hobennan di awendia
e.o. Farrah Boekhoudt, Elizabeth Guanipa, Tanya na Diario y Pilar na Bon Dia. Meymey di nan
tin tambe varios cu bon experiencia manera e.o. Giovanni Muller y Ruben Trapenberg (dfm)
di Tele Aruba, Leo Vrolijk , Nilton Lacle, Benjamin Romero y Tito Lacle. No por laga afo
Victor “Toko Winklaar”, Maritza Farro, Django Simoons, y Hilario Donker y Yuby Naar (cu a
bay cu pensioen). Nos no conose tur cu a join despues cu nos no tawata activo mas, pero ta
desea nan tur tambe tur clase di exito den nan trabao den e ramo di prensa. Nos no ta papiando
akinan di disc jockeys trahando na radio cu musica, pero di esnan den noticia mas tanto. Mi
tambe tawata un “Operadora of disc jokey” un tempo na Radio Kelkboom cu varios programa,
e.o. Dushi Awasero Musical, pero a gusta traha tambe den departamento di noticia, compila e
noticia y of como presentadora di noticia na Radio Carina y Radio Galactica 99.9 FM.
Awendia Lady Ruth ta un “Colaborador” y ta skirbi di su curason relatonan positivo cu por
inspira lectornan rond di dje. Shonnan, un otro Dia di Prensa a pasa, pero e trabao interesante aki
ta continua. Nos kier a gradici e.o. tambe Stan Dabian, e” PR man” di DCA, cu ta presente,
apoyando y elevando artistanan den e ramo social cultural den tur e conferencianan di prensa cu
ta wordo teni. Stan ta e cara y curason di e departamento di Cultura aki. Shonnan, te un otro
oportunidad atrobe den otro relato. Corda cuida ! Love you too !
