Aruba! Com bay ? Nos tey bek ! Nos tin laptop atrobe !Y nos ta den bon estado di salud, danki Dios, kemen, nos tin gasolin disel pa sigui cu nos relatonan semanal. Disel, pasobra, nos no kier corre duro di mas dilanti nos bon Dios, cu ta esun cu ta guia y inspira nos pa skirbi di curason pa curason atrobe. Ta un crenchi mas cu un luna pasa cu nos a comunica cu otro atraves di e fantastico medio aki, sea Diario, Solo, Extra Bonaire of E arubiano news on line.
Claro cu nos tambe a hanja boso falta ! Tawata dushi pa a topa hende, lectornan fiel di nos relato cu a bisa nos cu nan ta hanja falta di e palabranan poetico bunita positivo di Lady Ruth. Mientrastanto ta hopi cos a sosode, tawatatin hopi bunita actividadnan social cultural aki aya. Ora cu nos no tawata tin laptop mas, nos a keda pega cu algun topico, cu, kizas, toch nos lo duna nan atencion pronto pa complace e dushi hendenan ey tambe. Nos lo bay bek den tempo cu nan y pone nan tambe den lus. Lady Ruth a sinja fei maestro Don Cayochi Kelkboom di Radio Kelkboom, hopi anja pasa, den anjanan setenta, awe conosi como e fantastico Heart Radio, cu, no ta tur noticia ta muri mes ora. Tin cu tin balor cu ta sigui inspira.
Mientrastanto Lady Ruth a cumpli su di 67 anja di edad fisico, pasobra no tin un number exacto pa su edad spiritual cu ta tene su mente cla y raspa, y hopi jong. (Ora nos tawata bek na Aruba, nos a cumpra un pochi di un gel refrescante pa cutis, traha di productonan organico natural, e.o. di aloe y mint pa yuda kita e cansansio na cara tambe, serca nos bunita amiga Joan Ann, di tempo di grupo scout Santanero of Kimball O’Hara.) Joan Ann tin un bon surtido pa cuido di cutis . Bunita pa wak con nan ta progresa den bida. Pa bin bek riba nos 67, nos tawatatin e bendicion grandi y total di por a celebre hunto cu nos dos yui hombernan y nan pareha y nos 5 nietonan na Madre Patria Hulanda.
![](https://solodipueblo.com/wp-content/uploads/2024/07/IMG-20240623-WA0032.jpg)
E tempo tawata fresco, un crenchi friew dushi asina, manera bo ta den airco henter dia. De ves en cuando awa a yobe un crenchi y un of dos ves tawatatin un storm chikito. Nos tawatatin hopi tempo di calidad cu nos famia ayanan, hungando weganan di mesa, manera Monopoly di Aruba, Rumnikub, Domino, Mens erger je niet, Caramba y hopi mas, gozando un mundo, pasa masha masha pret mes hunto cu hopi harimento.
![](https://solodipueblo.com/wp-content/uploads/2024/07/IMG-20240703-WA0023-697x1024.jpg)
Nos por a wak, sinti e calor y gozo di e comienzo di e weganan di futbol pa e copa di Europa 2024 di cual su final nos a wak aki na Aruba mes. Nos a, ta y lo sigui apoya nos team di Hulanda cu hopi amor y alegria. Nos ta hopi orguyoso di nos Reina di Lama Sarah Quita Offringa cu a bolbe gana titulonan maximo den e deporte aquatico di surfing cu e ta gusta asina hopi. Y no pa lubida, cu, Aruba total ta orguyoso tambe di nos basebolistanan hoben cu a gana como Campeon di Caribe, si mi no tin hera, nan a gana di Sto. Domingo ofzo noh ? Of e nomber ta Republica Dominicana ? Ayyyyy, nos ta hanja un onvoldoende pa Aardrijkskunde serca meneer Adonsito Croes !!! Uffff……
By the way, pabien Adonsito pa bo participacion den un of otro pelicula den e exitoso Playa Film Festival. Nos tawata bastante ocupa den e dianan aki, no por a lesa Diario full. Corda shonnan, mi tin e bendicion di tin mi grandinan ainda meymey di nos cu mi ta duna atencion, amor, tempo y carino. Nos ta conclui nos relato cu e bon deseonan pa un bon y dushi dia yen di sabiduria den nos alegria ! Un dia bunita regala na nos atrobe, un dia colma di salud, bendicion, amor, pasenshi y hopi alegria ! Un “bearhug” grandi, diki gordo pa boso tur !!! Dios ta bon. Dios semper ta bon ! Danki pa lesa nos relato cu atencion atrobe . Te otro siman Dios mediante. Yeah, Lady Ruth is back in town and roaring !!!