Un bon dia yen di alegria ! Nos ta bay bek den tempo un rato y ta para keto un rato Diadomingo dia 1 di Maart 2026 cu un bunita actividad di EmpowerHer Nos ta UN High Tea cu tur e damanan nechi bisti den e tokenan color ros cla of scur, den e auditorium di Universidad di Aruba cu participacion di varios bunita y talentoso hende muhe di Aruba cu a comparti nan testimonio di nan yabi pa a logra exito den nan bida. Lyzaira Polak, Evelyn Wever Croes, Allyson Ponson, Rose Anne Ruiz y Miraila Bernadina Theodora di e Fundacion cu ta hopi activo na Hulanda, a comparti nan storia, y Lady Ruth a recita un bunita poema na ingles titula Being the change y a invita tur presente canta cu ne un cantica di y pa hende muhe cu su letranan inspira riba un melodia dushi simpel y bon conosi. Un super dushi momento cu sintimento di hopi alegria ! Ki impactante tawata cada testimonio cu tur nan ups and downs, nan obstaculonan surpasa, nan trabaonan duro incansabel y logra exito tras exito. Henter e publico hende muhe presente a biba y sinti cu cada un di nan, identifica nos mes cu nan como UN pasobra hende muhe ta sostene apoya y keda contento pa otro hende muhe. Hopi di nos tin nos grupo di sister friends.
Nos ta e curason di famia . Nos ta e inspiracion den nos comunidad den cas, trabao y obranan di caridad. Den bida real kizas no ta asina ki cu tur, pasobra, lamentablemente tin cu ta jalurs riba exitonan di otro cu a traha duro pa logra nan metanan den bida. Pero e bunita mensahenan expresa e Diadomingo mainta ey, a toca tur curason presente. E bunita trabao di MC tawata den man di e simpatico Jeanella Pietersz cu a tene tur presente bon atento y cu atencion pa su maneranan artistico y inspirativo. Y e bunita y talentoso artista Karena Maduro a deleita tur presente cu su bunita bos y a alegra nos corazon specialmente cu e dushi cantica di Izaline Calister Mi wowo di carinjo cu a pone Lady Ruth y varios di e damanan nechi presente bisti den algo cu e toke color ros los e heupnan y pianan un crenchi, riba e pleinchi pafor di e auditorium, despues di e interesante charlanan cu e dushi , super dushi hapjes en drankjes prepara cu hopi amor y carinjo pa Taste and tell Corner situa den San Nicolas.
Diasabra dia 7 di Maart nos a bishita tambe e bunita actividad di e fundacion Soroptomist den un di e salanan di Educampus Building, na unda antes tawata Bon Bini Bazaar den caya grandi. SICA Soroptomist ta e fundacion Internacional cu ta contra tur sorto di violencia contra hende muhe. Nan atencion pa cu e Dia Internacional di Hende Muhe Maart 8 2026 teni Diasabra dia 7 di Maart, tawata riba e tema trauma entre otro, cu oradornan Clementia Eugene,Sueli Kelly Quandt y Geraldine Lacle tocante Inner safety activation y a pone nos tur bay den un sorto meditacion pacifico cu nos peticion na universo pa algo cu a surgi bin ariba. Akinan tambe tawatin lekkere hapjes en drankjes available y un skina di duna massashi na nek y lomba pa algun minuut. Akinan tambe Lady Ruth a hanja e oportunidad di a recita un bunita poema titula Muhe di e bunita dama escritor poeta Regina ‘ Uchi’ Frans di nos isla ruman Bonaire, cu a cay na completo agrado di tur presente. Lieve mensen, danki pa e atencion pa lesa nos relato semanal, na unda nos a hiba boso un rato bek den tempo. Un ‘bearhug’ di Ruthy Lady Ruth. Sigi pasa un dushi dia yen di sabiduria den nos alegria .
