Dia 25 di e luna aki di Juni lo tin e siguiente Poetry Night, Nochi di Poesia, den Petjes restaurant situa den curason di Tanki Leendert, un restaurant cafe surnam cu nan delicioso hapjesnan . E tema pa e anochi aki lo ta “Cabes di pinda”. Lady Ruth no ta corda di a yega tende di e expression aki, pues no sa kico e ta nifica. Cabes di Pinda? Un cabes yen of un cabes bashi ? Yen di kico ? Un cabes yena cu cosnan bon y serio, alegre of un cabes yena cu cosnan bashi y fofo of den boca crioyo coi loco ?
Enfin, lo ta un bunita anochi atrobe yena di inspiracion, musica y pensamentonan comparti di temanan cu ta papia y of biba den e curason di e poetanan. Nos por corda e anochi di Poema di luna pasa na Marco Canteen situa den e area di waf nan ey, cu tawata hopi anima y hopi interesante cu e tema di “ Duna mi e curu”. Lady Ruth a hasta hasi un impresion cu su poema mencionando un palabra cu no ta bunita pa usa, pero comun y corriente den boca di pueblo, un palabra na ingles cu ta wordo usa ora di rabia pa algo of ora cu algo no ta bayendo bon.Hopi sa usa nan dede meymey pa expresa nan mes asina den forma curu.
Claro cu no ta tur poeta of escritor participante a expresa nan mes asina, pero e maestro di ceremonia Leo Phillips a manera spanta un crenchi hasta ora ela tende Lady Ruth usa e palabra na ingles ey. Nos, mi amiga Verna Beaujon y Lady Ruth a goza di e bunita anochi di Poesia aki cu algun glas di binja blanco y vodka on the rocks y scucha e poetanan recita nan poema. Tawatatin hopi poema cu a impacta, un mas cu otro, entre otro e poemanan di Walter Mohamed, di Jen, di Ivy Goeloe, di Maria Silva Hart y un di e dushi sorpresanan pa Lady Ruth ora su bunita subrina Queeny a bin padilanti na e microfoon y recita un poema super super bunita mes di con un bida of amor profundo di berdad por ta, asina, y tambe na un otro manera, trese asina un balans cu dos contesta ariba e mesun pregunta.
Despues nos a comprende cu ta un amiga di Queeny, Kimberly, a push un crenchi y duna Queeny su nomber na e maestro di ceremonia cu a invita Queeny bin dilanti y duna su fantastico presentacion. Nos por a comprende cu Queeny tambe ta gusta expresa su mes poeticamente, algo cu a alegra Tia Ruthy su curason mas ainda, ya cu ta algo bunita den famia pa hasi. Segun nos a comprende, e escritor Dominico Werleman tambe a recita pa di prome biaha na e Nochi di Poesia e anochi aki y a toca e curasonnan cu su poemanan impactante. Lady Ruth tin biaha tin otro compromiso y no ta bay nan tur, pero ta nota si cu mas y mas poeta y of escritor ta bin pa participa. Nos a hanja falta e anochi aki di e poeta escritor Lady Ari, cu pa motibo di otro compromiso no por tawata presente. Y e poeta Helena Fornara cu no tawata na Aruba.
Mas y mas hobennan ta join e Poetry Night cu nan expresionnan for di nan curason. Y e musico guitarista Rocky cu si tawata tey, a deleita e publico grandi presente cu algun di su cancionnan hopi biaha improvisa ariba e tema di e anochi. Su tocamento y cantamento unico den su estilo trese asina mas dushi ambiente. Leo Phillips semper ta hasi un bon y bunita trabao como e maestro di ceremonia y ta presenta cada poeta na un manera special y unico. E mes sa expresa su mes tambe fuerte poeticamente. Su bunita sra esposa Zyavyeram por ta orguyoso di dje, nos ta deseanan ketobay un eterno luna di miel, despues di nan paso tuma responsabelmente cu hopi amor y pasion pa e decision di a drenta e enlace matrimonial algo mas cu 6 luna pasa romanticamente ariba beach cu bunita bahada di solo. Un comienzo di Leo y su bunita sra esposa Zya como pareha cu amor pa otro. Y ainda mi no a tende fei esnan cu mi a puntra, kiko ta “Cabes di pinda”..Danki na tur e sponsernan di e Nochinan di Poesia organisa pa Sra. Maria Silva Hart, un bon Poeta su mes y Basha Foundation. Danki na Vibration PR, CMB ,Setar, Caribish Cultuur Fonds y tur otro cu tambe ta coopera regularmente, cu nos no por corda nombernan awor aki. Danki pa lesa nos relato/columna cu atencion y amor ! Un “bearhug” di Ruthy”Lady Ruth”.
