Ainda mi ta wak mi mes como un mucha, sinta dilanti televishon ta wak “The Flinstones” na Tele Aruba, back den tempo, anjanan atras ! Dushi ohm ! Hopi pret y bunita ! Awel….ta asina dushi mi a sinti, ora mi a drenta e restaurant Big Mama Grill na Baby Beach, aki mes na Aruba. E mesanan y stoelnan mes ora a capta mi atencion, waaaaw, awesome ! Stoelnan y mesanan stevig diki fuerte y hopi pisa , anto traha den e estilo di Los Pica Piedras, siiiiiii, di tempo di The Flinstones cu Fred, Barney, Wilma y Betty. Nan yuinan Pebbles y Bambam, e yui homber cu hopi forsa, y nan cacho Dino. Mesora Lady Ruth a pidi permiso pa sinta riba e scochi di “Big Mama”stoel y laga saca algun pics di dje den e bunita y dushi restaurant aki’cu adorno bunita di e banderin di Aruba colga tur na plafond, baylando den e dushi biento fresco, un bista super pero super nice pa turistanan y pa nos localnan mes ! Aruba ta nos, nos ta Aruba !. Un bunita y dushi famia talentoso y bendiciona, famia Raven, e felis propietarionan cu ta maneha, traha cu alma y curason pa laga tur hende sinti nan mes na cas den Big Mama Grill, no solamente e turistanan pero tambe nos localnan.
Nan tin un tremendo team di koki, bartenders y waiters y waitress, esnan trahando riba Beach, trahando cu amor, bau supervision di Lucas Bergen cu a hanja un promocion e mainta aki di Supervisor pa Manager. Famia Raven a organisa y prepara un bunita y dushi sorpresa pa nan Manager Lucas Bergen, tur bisti den nan bunita tshirt preto cu potret di Lucas ariba dje, cu a hasi anja e dia ey. Tur e miembronan di nan personal y staf a dirigi palabra na Lucas cu hopi aprecio, carino y amor pa su bon trabao profesional cu diciplina y cu curason. Lady Ruth a saluda y combersa cu Sr. Gilbert Raven, the best of the best cantante di tumba di Aruba, un di nos Tumba King pa hopi anja ! Hera nos a canta un cancion hunto e mainta dushi aki ! Guapo Gilbert Raven ta canta bon cu Mariachi tambe ! Gilbert a yega casi ta canta cu alegria ! Cu expresionnan di alegria ! E bos potente tey ! E otro dushi sorpresa, tawata ora Ruthy a topa cu su prinses Sra. Loutiza Raven, cu a canta “How great thou art” na e entierro estatal di nos ex prome ministro Henny Eman, algun tempo atras.
Recuerdonan bunita a bolter bin ariba, scuchando e gospel bunita den un bos super bunita, excelente y profesional cu curason di Loutiza, un hende muhe nechi y elegante, artistico inspira, bunita di paden y pafor. Pero ora bo wak su bunita mama Sra. Beverly y Lieve Tante Trisha, bo sa, cu no por otro. Tur ta hendenan nechi bunita, nos dushi hendenan original y natural bunita fisicamente y spiritualmente den nan trato cu prohimo. Despues cu nos tur a canta Happy Birthday pa Lucas, despues cu tur a dirigi palabra na Lucas, Lady Ruth a recita un bunita poema pa su ruman homber, den presencia tambe di Lucas su bunita y felis pareha Valerie y varios miembro di famia presente. Famia Gilbert Raven y Loutiza a habri cas Big Mama Grill y curason pa nos tur e dushi mainta aki. Nan menu ta superrrrrr! Nos a saborea di dushi snacks, dushi fruitpunch y of algo otro segun bo deseo y un dushi BBQ prepara cu hopi amor y carino ! Mientras nos tawata gosando di e dushi ambiente y compania, turistanan tawata drenta sali, drenta sinta come y bebe, saca potret y sali contento bay bek riba beach. Oh un bista bunita di e laman blauw cu su santo blanco ! Turistanan bau di parasolnan colorido ! Un tremendo team atendiendo nan ! Hendenan contento y satisfecho cu e bon y excelente servicio den Big Mama Grill.
Dr. Posner, awor gozando di su penshoen, a menciona con dushi e “goat dish” ta ! Valerie a saborea un di nan platonan di cabaron ! Heerlijk ! Hopi great tawata ora cu algun amigo di domino di Lucas a yega, ariba peticion y invitacion di Gilbert, Mr.G, y por a scoge un bunita mesa pa a sinta hunga domino, e dia aki, cu Lucas a hasi anja y cu ela hanja un dia liber pa fiesta cu nos tur na su manera, cu lus berde di su hefenan, famia Raven cu ta trata tur nan hendenan super bon mes ! E dicho, si bo staf y personal ta wordo bon trata y ta contento, nan ta traha contento y ta mas productivo ! Ki bunita bendicion ! Den nomber di famia Bergen y Simon, den nomber di Ruthy y Valerie, un danki super grandi na famia Raven pa stima nos ruman y nos pareha asina hopi ! E tambe ta stima boso , y e ta stima su trabao cu e ta super bon den dje, trahando profesionalmente cu curason yen di gradicimento pa e bunita oportunidad y cooperacion !
Danki pa e confianza deposita den Lucas, y danki pa a bin cu Big Mama Grill na Aruba. Hopi mas bendicion y exito pa boso tur ! Dios ta bon, Dios semper ta bon ! E sa y conose su yuinan !
Danki lieve mensen pa lesa nos relato di e siman aki cu hopi atencion ! Nos a sigui nos curason ! Nos amor y atencion pa nos dushi y bon hendenan di Big Mama Grill and restaurant, pariba di brug, den curason di Colony, banda di Baby Beach. Nos tin cu elogia nos localnan tambe pa nan bon trabao semper aportando turisticamente ! Asina cu e schedule di cuida nos grandinan permiti, Johan y Ruthy rumbo pa Big Mama Grill ! Yabba Dabba Doooooooo !!!! “Wilmaaaa……open the door !!!
