Scuchando musica gospel canta pa Alan Jackson “In the garden” nos ta full relaha den bon beis, despues di algun dia cu un crenchi griep cu tosamento un crenchi fastioso cu mi ta “ziek het uit” ainda. Mi a bin ta pensa riba e hardin grandi den bida, den mundo rond di nos. Ora mi ta den avion mi ta gusta meciona na mi mes, e hardinnan celestial cu ta permiti nos pasa den avion ariba nan of den nan. Mi pensamento a bay na hopi di nos dushi hendenan trahando den nan mesun hardin di trabao, sea loke e sea. Den hotel, den restaurant, na scol, na Serlimar, den oficina, den deporte, den hospitaal y den Wit Gele Kruis entre otro djies pa menciona algun.
Si, pasobra locual bo sembra bo ta cosecha ! Tur hende ta un hende importante den su trabao y mas importante ainda den su famia. Awe nos ta desea di comparti varios bunita cara y curason di nos dushi hendenan cu ta trahando cu amor y cu ta destaca den nan trabao. Y aunke e “hardin” por ta diferente, e pasion y dedicacion cu nan ta hinca den dje, ta hopi bunita y inigualabel. Nos tin por ehempel esnan di Wit Gele Kruis, cu hopi famia ricibiendo nan bon yudansa y tremendo asistencia vlot sin tempo pa perde, sigur, eficiente y profesional, pasobra nan tin hopi cliente patient. Nos ta menciona algun di e streanan bunita di WGK : Sheena , Cindy, Rosa y Krystle y den Wonden Poli na Hospital tin tambe lieve Nathalie,Emely y John, cu ta duna servicio excelente na nan patient clientenan.
Nos ta desea lieve Rosa di WGK tur clase di exito den su funcion nobo como Praktijk Ondersteunend Huisarts,(POH) despues di su tempo di calidad y capacidad cu hopi amor den WGK. Un di e cabayeronan fuerte den WGK cu ta hasi un tremendo y fantastico bon trabao profesional cu curason ta Gregory cu ta hopi fuerte fisicamente y mentalmente ,cu su mente dirigi y focused riba yuda e.o. nos Mama di cama pa rolstoel y bek, despues di a hiba Mama den Veranda pa gosa di aire fresco, sinta banda di Papa, wak paharitonan ta bula y wak hende y auto pasa dilanti cas tur Diadomingo mainta Dios mediante, gosa di e palo di mango den cura bailando cu e movecion di biento.
E dynamico y guapo Gregory semper den bon beis cu un bunita alma y curason ta hasje cu amor y carino pa Mama y tur su cliente patientnan y nos tur ta respet’e , apreci’e y stim’e pa e bon cuido atencion y ayudo pa cu Mama y e bon hende cu e ta, nos ta pidi Bon Dios mas bendicion di bon salud cu hopi forsa mas, alegria y mas sabiduria pa Gregory y pa su dushi y bunita famia.y bendicion tambe pa tur otro cu tambe ta duna di nan mes den nan bunita trabao. Nos ta comparti tambe varios di e caranan bunita y contento, bon trahador na Pbs Xerox, na unda Lady Ruth ta bay hopi biaha, ora di laga pone poema riba cartoline y laga placificeer e poema pa dura mas. Nos tin lieve Rosemary y e cahera, e simpatico Lily, cu su pasenshi atendiendo e clientenan profesionalmente. Rosemary tambe por hopi cos riba computer cu hopi creatividad y bunita inspiracion. Tin Amos tambe, un persona cu tambe cu su bon trabao den Pbs Xerox.
Nos tin Shon Alfredo, semper elegante cu su dashi di bunita color bisti pa match cu su camisa y carson y nos tin Giovany “Gio” cu ta master ful suave ariba computer cu tur sorto di servicio pa cu printing. Gio, e musico artista, un tremendo bahista riba guitara cu ta gusta toca den su tempo liber. Mientras nos ta warda riba nos poemanan pa bin cla, nos ta bebe un dushi koffie french vanilla di Smit en Dorlas di e machien para banda di e cahera. Aruba ta nos. Nos ta Aruba. Ta palabranan faborito di Lady Ruth, principalmente ora ta trata di nos hendenan original cu ta stima nos pais Aruba y ta duna bon servicio na tur patient of cliente. Un bearhug pa boso tur, y tambe pa Ebby Peterson cu nos a topa den De Bakkerij situa den Wilhelminastraat recientemente.
Ebby, un otro bunita cara y curason, un di nos gran artistanan cu a toca hopi biaha den e grupo di Padu Lampe awe dfm. Danki na tur cu a permiti Lady Ruth menciona nan den mi relato di e siman aki, y laga publica nan caranan y curason bunita pa sigui inspira tur rond di nos ! Danki pa lesa nos relato ! Un bon dia yen di sabiduria den nos alegria ! Dios ta bon. Dios semper ta bon ! Dios ta stima abo tambe ! Sea abo tambe un bunita creacion den bo hardin den Universidad BIDA.
