Nos ta kere ta normal pa nos tin nos curason cu sintimentonan mixto na e momentonan aki. Nos a ricibi e fecha pa e Hoorzitting di HOH pa trata y of scucha mi keho contra nan den e di dos siman di Januari 2026 na unda nan team di 10 of 11 persona lo tey , mientras nos lo tey solamente ami cu un persona, kemen dos. Nos no mag di bin cu ni 3 persona, locual tawata mi peticion di curason. Si e ta husto of no, nos ta bay segun nan reglamentonan, cu segun nos, ta locual ta pone cu hopi hende cu hanja mal trato of mal servicio na HOH no ta ni cuminsa pa yena formulario di keho pa cana e caminda di cruz aki.
Pa colmo, e info ricibi ta bisa nos, cu, e Zaalarts na warda e siman di negligencia contra mi Mama lo ta cu vakantie y lo no tey presente . Ach, si ta falta di seriedad of ta laga e situacion den man di arubianonan so, tuma nos hasi ? Muestra ken ta manda den nos hospital podise ? Cu sin e dokternan hulandes, no tin suficiente dokter akinan? Ta manera ta nos ta esun cu a comete un crimen di entrega keho contra nan ? Jammer noh ? Lo ta un experiencia nobo pa nos, e ta sinti ta manera dilanti mesa berde nos lo ta, net omgekeerd, cu nan ta esnan victima? Nos ta sinti hasta cu nan lo bin cu nan batayon di abogado pa steun nan ponencia? Naaaaah shonnan, mi a bisa fei cuminsamento cu ta splicacion mi kier di con no tawatatin dokter pa a bin wak mi mama ora su sucu tawata bahando drasticamente te bao zero hasta. Cu nan a bisa cu dokter tawata druk. Kemen no tawatatin mas dokter available anto ? Of ta na laman mes e zaalarts tawata gozando di nos dushi beachnan y laman ? Enfin, segun salud permiti, nos lo topa e team di profesionalnan medico etc. den Januari 2026.
Probablemente nos no lo comprende tur nan expresionnan den terminonan medico, podise toch nan por comunica simpel y humilde tambe cu pueblo, den e caso aki mi persona Ruthy Vrieswijk. Oei ! E relato ta casi yen caba y mi ta desea di felicita mi guapo primo Jerry , THE guitarman di Aruba ! Jerry Diaz, the best ! Nos a goza hopi na Passion scuchando su dushi musica y hasi conosi cu Nora di Passions cu su bunita head ribbon, un strik super bunita mes riba su cabes. E a dunami un compliment pa mi head piece cu mi amiganan haitiano ta gusta bisti. Lagami bisa boso cu dia 21 di December ultimo, Johan cu mi a cumpli nos di 48 aniversario di boda den un super dushi ambiente. Y Lady Ruth su celebracion den ambiente di Pascu cu su amiganan Idra, Milly y Miriam a cana masha dushi mes cu un super dushi ajaka ! Nos ta kere cu esaki por ta e ultimo relato pa 2025, pasobra e dianan ta largo y yen di actividad. Nos ta desea tur nos dushi lectornan un Bon Pascu y un felis 2026 cu salud, alegria, sabiduria y un dushi beis tur dia, dia pa dia, One day at a time ! Un “bearhug” grandi diki gordo pa boso tur cu amor y carino ! Danki pa tur bon comentario ricibi fielmente !
Dushi pa topa hende ketobay y tende cu nan ta gusta lesa nos relato semanalmente.
Lady Ruth ta skirbi di y cu curason, cosnan positivo nechi y bunita cu por eleva comunidad rond di dje y comparti potretnan di e diferente actividadnan cu e presencia. Ta de ves en cuando nos ta comparti situacionnan fastioso pa pueblo sa cu nos no por guli tur cos manda abao sin duna nos banda di medaya, manera ta e caso di HOH, nos hospital, na unda tin cu hasi mas esfuerso pa mehora e calidad den cuido. Nos sa cu e ta un situacion mundial, pero por hasi mihor trabao. Un bon dokter ta tene contacto y of bishita su patient den hospital y no ta neglisha patient pasobra e ta mucho druk. Un bon dokter ta papia y informa famia ora esaki wordo solicita y no ta depende solamente di e nursenan via telefon pa hasi nan trabao. Un bon doker ta admiti su foutnan, cu e no ta Dios y cu e no ta dicidi riba e bida di nos grandinan. No ta tur hende cu ta dokter ta un bon dokter.
Lady Ruth su diez placa di palabra, sinya den su Universidad BIDA. Dios mediante nos lo topa otro bek den 2026 . Mientrastanto cuida boso curpa y corda bishita bo grandinan, duna nan di bo tempo, atencion y amor. Scucha nan storianan, brasanan, bisa nan cu bo ta stima nan !
