Nos por a lesa un relato biblico masha bunita y berdad den e prestigioso AWE MAINTA on line, skirbi pa Pastor Marcel Balootje cu tur bon intencion pa informa, inspira y re-educa nos pueblo. E parti cu ta bisa cu e tata ta e cabes di famia ta berdad pero lo ta algo duro y crenchi skerpi pa accepta pa hopi hende kizas, pa motibo cu awendia tin mamanan soltera cu ta mama y tata pareu.Y tin mamanan profesional cu ta traha y gana mas hopi cu nan casa of nan pareha. Nos no ta bay profundisa nos mes den esaki, ta lage algo di curason pa cada famia cu ta respeta otro den nan relacion y den famia. Lady Ruth ta di opinion cu ta bon pa e tata y mama tuma decisionnan importante hunto y no lage cay riba lomba di un di nan so. Ta wordo bisa hopi biaha cu mundo ta cambia bira mas dificil y mas complica, no shonnan,mundo no ta cambia asina, si tin cambio den naturalesa cu e temporadanan di lente, zomer, herfst y winter, cambionan den construccion y moralidad.
Ta hopi di nos, e hende, e ser humano ta cambia cu hamber pa mas, mas di esaki, mas di esaya, principalmente ora di wak propagandanan na television encuanto “make up” cu hopi hende muhe ta cay den nan trampa y cumpra productonan cu ta ponebo bira addicto na nan, simplemente pa ta “mas bunita” .Ta un negoshi cu ta ranka hopi placa di bo cartera. Ta bon mes cu hombernan no ta hopi den cantidad cu tambe ta cay den trampa pa tinja cabey cu snor pa mustra mas hoben. Danki Dios cu tin hopi tata cu ta stima y cuida nan yuinan y ta pasa tempo cu nan na maneranan responsabel . Hopi tata ta gusta cuida nan cas, nan auto, nan trabao y ta gusta dal dos cerbes cu amigonan durante un wega di domino of wak futbol of beisbol na televishon of sinta den tribuna den oranan liber. Tin tatanan hopi balente pa yuda cu trabaonan den cas, pone panja laba den wasmachine, pasa un basora, of laba coi kibra. Nan ta responsabel hunto pa e huishouding den cas. Esnan cu tawata den scouting ta hanja esaki algo normal y bon pa hasi, bo ta sinja survive y para riba bo mesun pianan y por cushisna, laba etc. yuda bo sra.esposa cu semper ta hasi tur lo demas den cas. Nos mester di nos tatanan, nos mester di tin homber den nos bida pa e balans bunita crea pa Creador di amor. Lady Ruth ta sumamente contento y bendiciona pa tin su kerido tata Lucas cu nan, den bon estado di salud y cu ketobay ta duna nos consehonan riba tur tereno. Bendiciona pa tin su casa, e tata di su dos yui hombernan serca dje y bendiciona cu tur dos yui homber tambe ta bon tata di nan yuinan. Dios ta bon. Dios semper ta bon. Y aunke un dia comercial atrobe, ban duna nos tatanan mas tempo, atencion, respet y amor cu nan tambe merece. Nan ta fuerte fisicamente cu un humilde bon curason, y ta un lider, un guia super special pa nan yuinan. Scucha Lady Ruth su cancion dedica na tatanan titula : “E homber special” na Radio Galactica 99.9 FM. Nos ta desea tur tata un felis dia di Tata for di awe caba, cu hopi bendicion pa boso sigui ta un bon ehempel responsabel y confiabel pa boso yuinan. Danki Papa Lucas, danki Papa Johan , y tur otro tatanan pa ta e tatanan di mas special den famia. Nos ta stima, respeta, elogia, admira y gradici boso pa ta bon ehempel pa boso yuinan, nos nietonan. YOU are the blessings ! Pasa un dushi Dia di Tata y cu Tata Dios sigui bendiciona boso tur fisicamente, spiritualmente, emocionalmente y mentalmente pa boso sigui carga e responsabilidad di ta e homber na cabes di boso famia . E regalo mas bunita pa un tata, ta, pa wak su yui of yuinan felis y responsabel firme para den nan mesun sapato. Un bon ciudadano ehemplar cu respet pa su mes y pa otro.
No ta e placa cu e tata ta duna ta tur cos. Mustra interes den e cresemento y desarroyo di e mucha ta locual ta importante tambe. Duna bo yuinan un bon ehempel pa e sa su balor. Danki pa lesa nos relato ! Un “bearhug” pa Aruba y specialmente pa tur e tatanan !
