Nos gusta alegria. Nos gusta dushi ambiente. Nos a bisti nos t-shirt oranjo cu e logo di Oranjestad 200 anja ariba dje, dia nos a bay dal un keiro den e bunita hardinnan di Fantastic Gardens relaha un crenchi pa sinti un crenchi mas serca di nos dushi naturalesa. Nos gusta musica y nos gusta bayla. Nos ta menciona algun di e team dinamico di dj’s di GFM Radio Galactica cu nan tremendo marathon di canticanan oldies relaciona cu nan di 33 aniversario den aire cu e programa Oldies 99.9 tur Diadomingo di 5 or pa 8 or di anochi. Entre otro tin Renee Koolman y Tico B.
Nos a regala Maikel Oduber “Joe Hernandez” y Rowald Webb e poema cu Lady Ruth a inspira pa nan y nos a keda un rato di bishita den studio. Pabien GFM Galactica cu boso dushi super duper marathon di mi no ta corda cuanto dia of ora largo cu a companja nos na cas, den auto y hasta den oranan di anochi via Alexa . Awor nos ta pasa over pa relata un crenchi tambe di e fantastico Songfestival pa 60 plussers organisa pa Movimento ta bida, otro bon trabao atrobe di Bartholemeus “Roy” Sneek como e director musical e atardi/anochi aki di e banda Nos cu nos.
E parti organisatorio di henter e ataradi/anochi ( 4 pm te 10 pm ), segun nos a comprende, tawata den mannan di Roy y Martha de Miranda atrobe cu nan team di mas personanan cu ta stima bida y cu ta gusta move y bayla goza di bida. Personanan manera e.o. e conosido cabayero Rudy Leysner y Madel Jacopucci y Stella Toppenberg. Sorry si nos a bruha un crenchi den e nombernan.
Tawata un dushi anochi baylabel tambe e anochi ey den Renaissance Conference Center, rand rand di hende,pero cu espacio comfortabel, penshonadonan, esnan un crenchi grandi caba den edad, pero cu hopi zjeito den nan ainda pa move bayla y goza di bida. Kiwanis band y e Banda WE =WE di Wiwi Penja a percura pa un super dushi ambiente. Lamentablemente e ambiente a kibra un crenchi na final, cu publico cu e deseo pa clausura e anochi festivo aki cu e banda WE=WE , pero cu mester a interumpi nan set pa e banda Nos cu nos toca algun pieza mas, si nos no tin hera. Ya tawatatin 9.30 pm caba y e fiesta ta caba 10 or pm.
Dus, Lady Ruth y su casa a bay cas e ora, pa keda cu e dushi musica di e banda di Wiwi Penja den curason. Nos pabien na tur e ganadornan di e festival cu a conose hopi bon cantante sigur ! Den e categoria B a keda como ganador maximo Brigida Croes cu e cantica di Rudy Plaate “Tog mi sa “ y den e categoria A a keda como ganador maximo Juancho Ignacio di Dakota tur dia cu e version di e cantica na aleman “DU” na papiamento “Dushi”. Nos a topa hopi di nos dushi hendenan di Dakota e anochi ey, e.o. Ito Dania y Mario Luydens kende tambe a gana un trofeo. Roy Sneek cu tambe ta di Dakota. Segun mi Victoria Andrews tambe. Corda shonnan, Lady Ruth a bay pa goza y bayla, no pa tuma nota di tur e nombernan di participante, jurado y of ganadornan. Nos ta relata segun e inspiracion di curason. Algun participante cu ta bin na mente, ta Sansha Koolman y Roberto Orman. Nos ta corda cara mas liher cu nomber. Nos a sinta na un mesa cu e.o. Lydia Adamus y Sandra Jacobs.
E hende muhe bunita empodera Stella Toppenberg a causa furor cu su grupo Flor di Aloe. Y danki di curason na e gentil cabayero hulandes, e arucamba Wim Steenhuis pueblo por mira picsnan bunita ariba facebook di e fabuloso y dushi anochi aki di Movimiento ta bida, e ta gusta saca potret di hendenan presente na Djiespies tambe fielmente tur Diabierna. Pa conclui nos relato, permiti nos condoleer Luis Zarraga, Celine y Boy Lacle cu e fayecimento di nan ser stima Mireya Lacle, cu Lady Ruth a conose tambe como e payaso Krin Krin na Van dorp boekhandel , entreteniendo e muchanan cu hopi gozo y alegria no mucho tempo pasa. Un bunita hende muhe semper alegre banda di su esposo Luis, conosi den e mundo di farandula como presentador di su programa Desde el Caribe , cu artistanan local y internacional. Lady Ruth mes tawata den e programa ey na Tele Aruba hopi anja pasa. Nos lo recorda bella Mireya den su forma alegre di ta.
Condolencia, consuelo y amor na tur cu a conose y stima Mireya Lacle.
Mireya, drumi dushi serca bo Creador di amor. Shonnan, danki pa lesa nos relato. Pasa un bon dia colma di salud y gradicimento pa un otro dia mas di bida. Un “bearhug” di Ruthy”Lady Ruth”. Goza di e preparacionnan pa cu e fiestanan di fin di anja. Y corda, no tin pura ni ansha riba caminda, core cu cuidao.
