Un dushi dia yen di sabiduria den nos alegria pa nos tur ! Nos deseo pa cubri e actividadnan ainda den 2024, ja cu e dianan ta bay pasando y pronto nos lo canta Nochi di Paz den nos Iglesianan, pa e celebracion dushi di Pascu. Pero prome cu esey, nos eleccionnan pa un gobierno nobo y of ripiticion di nos bon gobierno actual.
Den luna di November ultimo, Lady Ruth a bay conta storia, canta y recita poema pa nos grandinan den St. Michael Paviljoen na playa, ariba invitacion di e simpatico Ivy Goeloe Peterson cu hopi amor y carino pa nos grandinan. Tawata un dushi mainta di duna danki sigur ! Tambe nos a bay bebe koffie cu un amigo di tempo di nos hubentud den mi dushi bario di Dakota tur dia, cu tawata na Aruba cu su dushi y bunita famia di Hulanda, na unda nan ta biba. Danki amigo Michael pa e invitacion di curason.
Bida a bay bo bon y bida a bay ami bon. Awor nos ta penshonadonan gozando un crenchi di bida cu nos mesun famianan. Tambe Lady Ruth a drop in na Op = Op riba Sasaki pa busca un kerstboom chikito di hero fini no pisa cu ela cumpra p’e na Op = Op na Paradera, pa hiba un pa su mayornan pa dorna nan kamber, un kerstboom cu no ta garna, pero no tawatatin na Op = Op na Sasaki. Pero, e bunita y simpatico Yeilis a comunica cu otronan den Op = Op Sasaki y a bin ta regala Lady Ruth un kerstboom berde chikito di palo cu lugar pa colga 7 bala, oh asina cute riba su stand.
Un size perfecto pa fit ariba e kashi den kamber di su mayornan, cu dia 28 di November 2024 a cumpli nan di 71 aniversario di boda, cu nos a celebra intimamente den famia cu yuinan y nietonan den un dushi forma cu dushi ambiente familiar. E anja anterior cu nan di 70 aniversario nos tawatatin bishita di dos di nos dushi hendenan, Pastor Jairo y nos flamante ministro di cultura sra. Xiomara Maduro cu a comparti e bendicion y un toke special di nan curason pa nos mayornan Lucas y Mercedes Bergen-Tromp.
Danki di curason lieve Yeilis y su coleganan amabel di Op = Op Sasaki pa e bunita regalo aki , altamente aprecia ! Nos ta spera di bin cu mas tocante e benta di pastechi den Cas di Cultura cu ta on hold pa x motibo. Gerente di Cas di Cultura a bisa nos cu ta departamentonan di gobierno tin’e tranka. Pero nos a tende foi un di nan empleadonan cu nan kier bay bende snacknan saludabel, pero ya tawatatin un famia cu a bende snacknan saludabel, kemen ta e prijs di huur di cushina ta mucho halto ?
Hopi a yega di wak con e bendedornan di pastechi ta trese nan bakinan di foil yen di pastechi pa bende, kemen no ta hasa nan den e cushina di Cas di Cultura. Unda e fayo ta sinta anto ? Ta algo crioyo di Aruba , pakico no ta bende esaki mas ? Enfin, ban pensa na nan musical Grease cu pronto lo ta ariba stage den e lugar aki, cu ta di pueblo y no di un solo team cu ta maneha e lugar aki toch ?
Pastechi y croquet ta algo cu mayoria cartera den pueblo por paga. Come on ! Hasi algo pa bida hasi algo pa pueblo ! Nos ta conclui nos relato di e siman aki, deseando un y tur dianan trankil di reflexion pa famianan ta uni y celebra hunto e dushi dianan di Sinterklaas y despues Pascu y cambio di anja na maneranan responsabel sin di mas alcohol. Y cu e prijs halto di 50 of ta 45 florin pa un musical adapta na nos dushi isla hopi penshonado lo no por bay goza di e show aki, segun Lady Ruth a comprende den varios combersacionnan aki aya,( a menos nan wordo gesponsered). Nan sponsernan no ta suficiente ? Enfin, lo ta leuk pa muchanan di scol bay wak e show aki. Nos ta gradici nos fiel lectornan cu ta custumbra cu Lady Ruth su estilo di skirbi cosnan bunita agradabel y positivo cu ta pasa y of cosnan como criticanan constructivo pa esnan concerni. Goza di e dushi musica di aguinaldos y gaitas cu ta resona na nos emisoranan local.
Pasa un dushi dia yen di sabiduria den nos alegria y un bearhug grandi di Ruthy cu su invitacion pa bin pasa ratonan ameno na UNOCA diasabra anochi dia 7 di December cuminsando pa 7 pm cu un mercado leuk y dushi di Pascu cu dushi musica di aguinaldos y gaitas. Lady Ruth tambe lo tey pa recita poema pa inspira tur rond di dje cu e amor y lus di Pascu.
