Shonnan tur un bon dia yen di sabiduria den nos alegria ! Awe nos lo comparti un chispa di 2 bunita anochi na Unoca , casi na final di anja pasa ,un, e tremendo exposicion di Caha di Orgel. Aki na Aruba tin hopi caha di orgel y tin di 100 anja biuew ! Nan tur a ricibi un bunita certificado di aprecio y gradicimento for di Unoca y tambe un copia di e poema di Ruthy. Y dos, nos lo comparti tambe un algo di e dushi y bunita actividad Toke di Pascu na cual occasion nos a recita un poema, dedica na occasion di e despedida di e bunita y carismatico Director profesional di Unoca Ray-Anne Hernandez cu a join e team di Unesco y sigui comparti , inspira y engrandece su conosemento y capacidadnan profesional den Unesco. Prome e poema dedica na tur e donjonan, tocadonan di caha di orgel.
“NOS CAHA DI ORGEL”
Nos caha di orgel ta yena nos curason cu dushi melodia
E ta papia cu nos den su mesun bos claba, e ta un fuente di alegria
Cu bendicion di bon Dios, cu a duna trahadornan y tocadornan
di caha di orgel bunita talento pa hasi nos tur contento
E “tingilingi box” pa nos turistanan den Bon bini festival
Nos dushi caha di orgel fuerte y fiel, musica unico dushi y original
Cada caha di orgel ta unico y sensacional,ankra den nos cultura cu su mesun dulzura
Tono di nos tradicion pa semper den mente alma y curason
Pabien y danki na tur cu tin un of mas caha di orgel cu ta resona
Nos isla Aruba ta bendiciona.
E sigiente poema dedica na e bunita cara y curason di Unoca pa 8 anja.
RAY-ANNE HERNANDEZ
E ta bay sigui riba su biahe di bida, hasi mas cosnan riba tereno cultural social cu e ta stima
Despues di 8 anja como director di Unoca, un hende muhe cu un bunita lus den su curason
El a traha cu inspiracion y dedicacion, e merece un copa di responsabilidad y lealtad
Su dande ricibi den December 2024, cu gradicimento di nos tur cu ta creativonan bibo
y talentoso, Ray-anne a lidera su bon team cu alegria y gozo
Aruba y artistanan ta respete y stime, pero e ta bay ey mes, traha cu Unesco
Cu e mesun amor y pasion bunita dushi y fresco riba bayle di musica folklore cu tanto e ta gusta
Cu lo acompanyele semper den tur color, den melodianan di amor
Sigui luci y briya lieve Ray-anne di Unoca, bo lo ta awor Ray-anne di Unesco y di Aruba
Bo lo sigui cosecha cosnan bunita y unico sin duda
Sea bendiciona den bo bida y den bo carera profesional, manera bo no tin 2 igual
Danki pa 8 bunita anja di amistad, pa bo hopi exito y felicidad !
Lady Ruth a recita e poema pa Ray-anne, durante nan dushi actividad Toke di Pascu, organisa pa Josephine Peterson “Josie” di Unoca masha masha bunita mes hinka den otro cu aguinaldos,un grupo di bayle, mesanan cu obranan di man, un bar y cushina bon surti. Esey tawata den December anja pasa y un tiki prome cu e fecha ey tawatatin e exposicion di cahanan di orgel. Nos a comparti toch un crenchi di e dos bunita actividadnan aki ariba peticion di lectornan cu ta pidi nos. Danki pa e atencion di curason ! Ta manera riba facebook cu pics “Back in time”, cu bunita recuerdonan bale la pena comparti sigur. Un “bearhug” di Ruthy”Lady Ruth” Vrieswijk-Bergen. Keda pendiente pa hanja sa un crenchi mas di su prome buki pa mucha, na idioma papiamento cu ta obtenibel na e librerianan. Un dushi storia titula “Rene su dushi wega”. Un otro sonjo realisa danki na e 4 forsanan grandi na su banda : Dios, su esposo, Unoca y Aruba bank cu lo regala scolnan basico un of dos buki pa nan bibliotheek. Sin lubida, su man drechi den henter e proyecto :Queen Irene Peterson, pa e layout y illustracionna bunita ! Un bon y felis siman colma di salud, alegria y sabiduria cada dia di nobo regala na nos danki na nos Bon Dios.
