Nos a cuminsa wak e salida di e Parada di Luz di Carnaval 71 na canal 22 cu e flamante Sandra y un cabayero cu nos no a catch su nomber. Nos a ripara cu den Vondellaan, na unda e team filmado di canal/top 95 fm ta para, dilanti nan y na banda di nan no tin e baricadanan cora cu blanco . Un toke bunita pa e pueblo para na banda sinti nan uni cu e participantenan den e gruponan. Nos no sa si ta riba henter e ruta di e Parada di Luz esaki ta asina ? Nos no a sigui wak, nos a bay chill den kamber sucha dushi musica country via Alexa. Ya pa anjas nos no ta bay wak ningun parada mas, ta prefera di wak e fei cas na televishon den un ambiente mas confortabel cu tur cos serca ey mes. Banjo, cushina y bo reclyner dilanti televishon.
Cu edad aumentando bo interesnan ta cambia y bo ta mas dushi den bo comfortzone rond di bo. Y ta hopi ta pensa mescos cu Lady Ruth. Tempo nos tawata mas hoben nos tambe a bula baila djodjo den varios parada di Carnaval cu Los laga bay y cu Dreamteam St. Cruz. Pa nos, no lo tin e canticanan impactante mas manera tur e canticanan di King Claudius Phillips. Nos no a scucha e festivalnan di tumba y of calypso cu roadmarch e biaha aki na radio ni a wak e na televishon tampoco.
Pero, ta scucha nan na radio Galactica ora nos ta keiro den auto atardi wak e bunita dushi solo baha den laman. Despues di e programa tan gusta y scucha Memories, nan sa bin cu programanan cu musica carnavalesco. All in all, nos no ta Carnaval minded mas. Prefera di wak un bunita pelicula, pinta of inspira poema, locual nos ta gusta mas y hasi hopi hende rond di nos contento cu mi talentonan di scirbi. Prome nan aya bo ta hanya mas participante den eleccionnan di reina, awor tur cos ta placa placa placa, habla di amiga Philomena Wong den felis memoria, cu a pre mira y pre sinti den su poema di Placa ya ta hopi anja pasa, ora cu ya mas y mas por a ripara cu tur kier luhia sin preocupa e debe cu nan tin cu sigui paga despues.
Y pa colmo sa rabia tambe ora nan yui of nieta no sali reina di Carnaval di Aruba. No, shonnan, no ta un joke mas. Pero…ta keda na cada ken pa cu nan mesun decision di curason. Mane ta bisa na ingles “ YOLO “, You only live once “. Lady Ruth nunca a gusta e competencianan den eleccionnan di reina durante anja tampoco, ach, simplemente nos no por cu tanto cosnan falso na hendenan cu normalmente originalmente ta bunita, pero ta tinja, street cabey, usa wimpers falso di un meter cu nan kier bo mira djalew, wowo mita sera, ufffffffffffff, not for me ! Tempo Lady Ruth como teenager Ruthy tawatatin 13 of ta 14 anja, of hasta 15, ela wordo aserca pa participa den competencia di Miss Teenage. Naaaaaaah, nada pa mi ! Nos gewoonweg ta kere cu tur mucha muhe ta bunita riba nan mes. Con bo ta bay scoge entre un chinees, un hindu, un africano y un macamba ofzo ? Ta un sorto di discriminacion of no ? Enfin, nos ta pro e dushi ambiente alegre si durante e temporada aki di carnaval y nos a decora un parti di nos cas cu mi mesun BAR. Otro cos, awor no ta “Bo amigo didi”mas, awor ta Bar, bo amigo responsabel. Y asina lo sigui, semper lo bin un otro cu su idea y nan ta lubida esnan cu tawatatey caba promer. Ami tin un “ MCP” …Mi chauffeur priva, hahahahaha. Laga nos hari un crenchi, pasobra, ta hopi ya a awordo yama nos dilanti pa bay den e mundo mas aya. Nos ta desea e famianan, amigonan y conosirnan cu a despedi di un ser stima hopi condolencia, consuelo y amor. Recorda nan den felis memoria y semper nan lo ta mas serca di mente, alma y curason. Tristeza ta bay man den man cu alegria tur dia. Nos por tuma bida “One day at a time” cu gradicimento na nos curason y sigui cuida nos mesun salud. Pasa un dushi Carnaval grandi weekend cu ta bin, goza hopi den famia, y cuida otro. E ta un temporada dushi sigur sin duda, na unda creatividad ta lora su mes den tur sorto di color den fantasia. Pabien na tur participantenan y na tur reinanan den nos bunita paradanan den carnaval 71 .Pabien na tur gruponan musical y nan cantantenan. Pabien na tur e scolnan cu a celebra den nan maneranan simpel y colorido tambe e dushi fiesta cultural aki, adapta fey otro partinan di mundo. Lady Ruth no ta desea di papia tocante e beach bandi strand politie cu nan a kita fei pueblo na maneranan fini fini pero cu un skop cu pia dobla, pasobra esnan den esaki, no por sigui fingi den un consenshi trankil cu atrobe pa placa placa placa nos muchanan cu nan famia no por sinta bao di e palo di kwihi mas .Ach, toch nos a bisa algo. Un persona cu a topa nos den supermercado a bisa, cu ta tur gobierno tin bon y malo, pero cu cada ves e bon ta sigui bira mas malo. Hopi laf mes ! Sin amor pa prohimo riba mesun isla, pero si pa e stranheronan cu ya a hanja hopi caba, ta wordo mima cu mas….pa placa placa placa. Amiga Philomena Wong rip, gran poeta, bo a dal e clabo riba su cabes ! Nos ta termina nos relato cu un pabien y danki grandi na Aruba Bank cu otro bunita regalo grandi diki gordo di 100 mil florin na SEPB Stichting Educacion Profesional Basico pa promove educacion vocacional y futuro di nos hobennan den area laboral. Ta nan di dos donacion den cuadro di celebracion di 100 anja, un siglo di muestra di confianza di e pueblo di Aruba y e relacion forma di nan cu nos comunidad. Saludos di Ruthy cu un pic saca na Gloria, un bunita installashon artistico carnavalesco obra di e gran artista cu estilo unico y super bunita, Elizabeth “Bea” Quilotte Croes.
