E bunita luna di Mei ta casi yega su final,, e luna den cual a duna tur Mama extra atencion, e luna di Ricibimento. E luna super special pa Lady Ruth, en particular dia 19 di Mei di anja 1978 ora ela bira Mama pa di prome biaha di su prome yui homber Regnier y despues wordo bendiciona cu un di dos yui homber Jean. Nos bendicion di mas grandi , cu nos bunita y dushi Mama Mercedes cu ta wordo yama Mayo ta meymey di nos ainda, aunke cu un crenchi alzheimer, pero cu luz den su bunita curason pa nos tur ketobay . E tema di Mama y of actividadnan pa cu Dia di Mama ta cosnan bunita, pasobra hopi ta hanya y of usa e bunita oportunidad aki riba e Diadomingo Dia di Mama pa brasa y bisa Mama, Mamie,Mamai of Machi cuanto bo ta stim’e, aprecie y respete durante henter anja, pero riba e Dia di Mama hopi mas !
Y aunke pa varios e ta un Dia comercial. Lady Ruth mes a reserva pa un dushi Brunch na Que Pasa y a invita su casa bay cun’e. Tawata un bunita mainta/merdia. Lamentablemente Lady Ruth no por a bay celebra cu e bunita grupo di oracion di Modanza di Vidente Valerie nan dushi celebracion cu dushi musica y canto di e gran artista cantante El Duque Victor Samuel cu compania vocal tambe di su bunita pareha Vivian Lampe, yui muhe di Juan Chabaya ‘Padu’ Lampe, kende ademas di ta toca piano bunita, sa canta bunita tambe. Pero nos a ricibi e informacion cu e anochi tawata sublime y cu despues di a gradici e Mamanan saliente, cu tawata 2 mama anja pasa, a yama bon bini na e mama nobo pa 2025 den persona di sra. Violeta Orman, otro shon di hende cu amor pa su famia y pa su grupo di rumannan den Christo di e grupo di oracion di Modanza. Bunita tawata cu Vidente Valerie a uni cu Victor y Vivian y den trio a canta masha bunita mes. Un bunita anochi bau strea, cu atencion y amor pa nos mamanan cu por a disfruta tambe di algo dushi di come y bebe, ademas di a ricibi e serenata musical cu canto di Victor y Vivian. Vidente Valerie ta mama di 3 yui muhe y awor tin un nieta y un nieto, regalonan precioso di Tata Dios pa nan famia. Vidente su bunita mama, mama Hortencia ta bendiciona cu su bunita famia, su yuinan y nietonan y su dos bisanieto. E grupo di oracion di Modanza ta existi hopi anja caba, antes conosi como e grupo di Koyari,pero awor bek na cas Modanza 11 A ,hopi activo y yen di bunita inspiracion.
Cosnan por a cambia un crenchi desde e tempo ey, pero e curasonnan a keda fiel cu amor pa nan Creador. Fielnan di e grupo a keda para firme den nan bunita fe y ketobay ta mira y experiencia bunita frutonan. Danki Vidente, pa ketobay ta sigui den su caminda di yuda prohimo ruman cu un of otro oracion ora mester y of un bishita durante e caminda di peregrino y asisti na Misanan. Ki bunita pa wak nos chikitinnan tuma nan prome santa communion durante nan Ricibimento y di edad hoben caba hanya e amor, luz, guia di Papa Dios y Jesus e pilar di mas fuerte den nan bida pa yuda nan crese spiritualmente , sinya y madura na edad mas halto, pasobra bida ta sigui tin su ups and downsnan y lesnan pa nos tur sinja di nan den nos bida fisico, mental, emocional y spiritual. Danki pa lesa nos relato cu atencion, danki pa e bon comentarionan ricibi regularmente di nos fiel lectornan. Pasa un dushi dia yen di sabiduria den nos alegria ! Un ‘bearhug’ grandi pa tur y cu bo sigui pasa e brasa grandi aki pa otronan rond di bo cu mas tin mester di nan. Corda shonnon, un palabra positivo, un palabra di carinjo, un bon comportacion y un bon actitud den nos bon hempel ta hiba nos mas leu riba nos viaje riba e mundo aki, na unda nos tur ta como pasahero biahando dia pa dia, cu nos rutina diario pero tambe cu cosnan nobo cu ta sinja nos pa ta humilde y gradicido semper !
