Con tempo ta pasa liher, pasa nos voorbij, ora nos ansha nos curpa pa hasi cosnan cu no tin asina pura. Con tempo ta inspira, ora nos tin pasenshi, ora nos ta trankil y goza di locual nos tin cu hasi. Sea ta na cas of na trabao of den nos tempo liber. Tempo ta un regalo precioso duna na nos pa nos ta bek un regalo pa Dios. Lady Ruth, birando poco poco un adulto mas mayor, ta hasi bon uso di su tempo. Nos no ta ansha mas pa otronan y nos no ta bay tur caminda mas ora nos no tin smak pa bay.
Hopi kier tin mas tempo ora sufriendo kebrante di salud, mientras otronan ta malgasta nan tempo cu bebemento. Lady Ruth no ta bisa cu bebemento ta malo, solamente si ta esey so bo ta hasi dia den dia afor anto bo mes ta hasi bo curpa malo. Mester tin un balans den tur cos. Tur cos di mas ta malo pa salud. Ora bo para keto un rato y realisa, bo ta ripara cu , cada dia no ta mesun dia, y cu prome cu bo realisa, ya un otro dia, un otro siman, un otro luna y un otro anja a pasa. No warda y tene bo na cosnan solamente “pa majan” of pa “dia bo tin penshoen”, pasobra nos niun sa di majan si nos lo mir’e.
Un pida chikito di nos ta bay den “ayera” cu cada bahada di solo, un ta sina ? Pero mi ta gusta si e palabranan di mi grandinan, pa, no warda pa hasi mayan locual bo por hasi awe. Kemen tin cosnan cu nos tin cu realisa y hasi awe, enbez di pushele pa hasi mayan. Tin cu ta spaar y spaar, traha duro y spaar pa nan bay cu vakantie largo otro anja. Nada robes den esaki, pero, nan ta lubida di “biba pa awe” y no ta hasi nada leuk mas, ni sali bebe koffie of wak un cine, pasobra nan tin cu spaar. Ufffff…..awendia tin e facilidad di usa credit card y paga despues. Hopi ja ta hasi uso di esaki.
Tin ta traha pa biba y tin ta biba pa traha. Ufffff…..Lady Ruth regularmente ta cu e pensamentonan varia y abstracto aki, principalmente despues di a tende cu un otro conosi, famia of amiga a bay laga nos. Mi ta sigur cu hopi tin e pensamentonan aki ta keiro den nan mente, sinta na un entierro y por pensa, con lo kier wordo dera of crema ora di muri.
Hopi kizas no ta ni worry mes y ta kere cu nan ta aki den e mundo aki pa semper. Nos fe, y nos cada un tin un midi di fe, ta mustra nos cu nos alma lo bay bek serca nos Creador. Nos curpa lo marchita, bira biew y muri un dia, ni maske cuanto cirugia plastico di beyeza a hasi pa keda hoben, tur tin cu crusa e brug pa e mundo aya un dia. Lady Ruth ta un crenchi ocupa ta organisando un ke otro, pero asina cu e keda cla, e lo bolbe bay bishita nos grandinan pa conta nan storia, recita poema pa nan y of canta cu nan. Mientrastanto den su oranan liber, e ta ketobay gusta bay bebe un dushi Aruba swing na Coffee House serca Betty den oranan di atardi. Mainta e sa bay cu su amiga Verna of su esposo Johan. “Taking it easy”, suave relaha y combersa. Nos kier a manda condolencia pa famia y amigonan di Albert “Cachi” Henriquez cu tempo di su tempo activo a duna les di tennis na nos dos yui hombernan riba e cancha na Eagle y antes riba e cancha na Tarabana cu no ta existi eynan mas. Tremendo instructor di e deporte aki di tennis. Un cabayero stret to the point, serio, sincero y honesto. Cu Cachi sosega na paz y lus eterno lusa p’e. Ta varios conosi a bay nos dilanti ultimamente. Na boso tur cu mester a despedi di un ser keri, condolencia, consuelo y amor ! Shonnan, hasi bon uso di boso tempo precioso regala na boso dia pa dia. Cu gradicimento na e curason !
Y cu esey, un toke mas alegre nos ta conclui nos relato. Nos ta saluda nos famia beautiful Amber Bergstra cu graduacion di un di su prinsnan Luceni. Nos bishita serca nan na Hulanda tawata un di e hi lite’s nan cu un dia hopi agradabel cu su prinses tambe Dominique “Dodo”cu su felis y guapo pareha . Nos no a logra topa cu Amber su otro prins Thomas, pero a regala nos e bunita pic di nan 4. Tawata dushi pa a topa cu Tante Gietie y Oompie Elvis. Danki lieve Amber pa e atencion, amor y carino ofreci na Johan y Ruthy. Pronto nos ta topa atrobe, Dios mediante !
Shonnan, danki pa lesa nos relato ! Saludos di Ruthy Lady Ruth cu un “bearhug” grandi !.
