Ta ken no ta desea di tin independencia financiero ? Pa tin algo di placa cu bo mes por maneha responsablemente ? Hopi di nos ta gusta tin placa, pero no sa maneha locual nos tin na un manera responsabel. Of no tin e confianza entre parehanan pa hasi esaki hunto. Y tin tambe cu no tin acceso na placa mes, pero cu ta un so ta maneha e entrada, cumpli cu pagamento di e gastonan etc. y duna su pareha locual e mester, locual ta necesario, pues locual e tin mester pa por ejemplo paga pa e kipashi, beleg, webo y juice y ni un florin mas .
Ta tema y topiconan cu a wordo trata durante un tremendo charla den e edificio di Educampus, ex Bon Bini Bazar den centro di Oranjestad recientemente organisa pa e fundacion Soroptimist cu su dinamico direktiva encabesa pa e simpatico y carismatico sra. Magaly Maduro Koolman. Un fundacion di y pa hende muhe, trahando pa stop violencia contra hende muhe. Sra. Paloma Tromp, un tremendo orador y conosedor di e tema crenchi delicado aki. Paloma ta un profesional y a inspira nos tur presente na e charla interesante aki. Placa, un topico of tema delicado pero necesario pa papia di dje. Paloma, un coach financiero y director di fundacion Plan di bida. Lady Ruth tambe a sinja hopi e mainta aki, pasobra, e tambe tin un “buraco” den su man ora e bay supermercado cu su lista di compras cu 7 producto nota pa cumpra pero ta bin cas bek cu 12 di cual algun e no tawatatin mester, pero a cay den e tentacion pasobra e prijs tawata bon.
Paloma a comparti e.o. con ta bon y bunita pa sigui bo sonjo y realisa esaki, si bo ta bon den traha buscuchi, traha y bende esaki pa un crenchi mas entrada of pa un entrada pa bo si bo no tin ningun entrada, pero ta depende solamente riba e casa cu tin biaha no ta laga su sra. sa unda tur e placa ta bay. etc. (E palabra buscuchi a zona hopi dushi mes den Lady Ruth su orea, corda e tempo di su infancia come buscuchi, awor cu e nomber koekie.). Cosnan cu ta pasa ketobay den e siglo aki. Doloroso pero berdad. Lady Ruth a hasi conosi e mainta ey cu nos flamante Miss Universo Aruba 2025 Hannah Arends cu a bin duna su apoyo y sosten na tur esnan presente. Danki na fundacion internacional Soroptimist Aruba pa un exitoso charla hopi informativo y educativo. Nos ta conclui nos relato mandando palabranan di pabien na amiga colega Poeta escritor Ivy Goeloe Peterson cu su solo expo na scol di arte San Nicolas . E bunita expo aki “Word in art” lo por wordo admira durante henter e luna aki di September durante e orarionan habri di e scol di arte San Nicolas.
Su apertura tawata riba Dia di Prensa, dia 1 di September cu dushi coi bebe y snacks y cu presencia e.o. di Sra. Tromp-Frans, e bunita mama di Marisol y Lelicia, cu segun un paharito a bisa Lady Ruth, ta na caminda pa estrena den e capitulo 2 di e pelicula local “E bruha bruha”, Yosmar Maduro di Biblioteca Nacional, Verna y Lady Ruth,y amiganan y famianan di Ivy. Un anochi agradabel y hopi gezellig. Despues di scol di arte Verna y Ruthy a bay bishita e anochi di apertura tambe di e expo “E lens di mi wowonan” di Leo Vrolijk, un cabayero den e ramo aki di filmacion y saca potret pa hopi anja caba pa Tele Aruba, na BNA, pero e parti di apertura oficial ya a pasa caba. Nos a yega na ora si pa felicita Leo y cana rond y admira e potretnan y brinda cu nan tambe cu un wijntje y un super dushi snackbox traha pa bunita amiga Eta, ruman muhe di Leo Vrolijk. Eta bo ta master !!! Despues nos lo bin cu nos version di e bunita anochi aki tambe.
Un proyecto cu ta existi ya pa hopi anja, patrocina pa RBC bank y cu participacion di varios fotografonan den prensa. E expo aki tambe lo ta habri pa publico pa varios siman den e luna di September. Shonnan, danki pe atencion duna na nos relato di e siman aki y pasa un bon dia yen di sabiduria den nos alegria ! Un “bearhug” di Ruthy”Lady Ruth”.
