Y ata nos cu nos relato nobo, tambe bek un crenchi den tempo. Pero, tambe ta un tema cu no ta drumi pero cu sa cabisha. Nos grandinan. Nos adultonan mayor. Nos bieunan. Awe nos ta bay relata un crenchi di nos bishita na e exposicion pa adultonan mayor cu a tuma lugar no mucho tempo atras den Hilton Hotel cu participacion di hopi organisacion y instancianan, trahando y yudando nos grandinan. Un mainta organisa pa Vibration PR y su comishon di profesionalnan, exitoso cu tur sorto di informacion na bienestar di nos adultonan mayor.
E simpatico, dinamico y talentoso sra. Maria Silva Hart a duna di henter su curason na e dushi mainta aki. Lady Ruth y su bunita sister-friend Verna Beaujon a cana rond wak y scucha diferente topiconan di instancianan tocante nan servicio cu nan tin pa nos adultonan mayor. Nos tur ta desea di biba largo, biba hopi y esey por solamente dor di bira bieuw, bira grandi di edad y si por den un bon salud. Si bo no kier biba largo, bo tin cu muri jong anto. Algo cu hopi no kier papia di dje. Nos hobennan cu ta kere nan ta hoben pa semper. Uffffff! Nos a papia e.o. cu e hendenan di Eden Embrace, Benjamin Security e.o. cu nan medical alarm, Buurtzorg, Rode Kruis y hopi mas, mientras e pianan y heupnan tawata tin gani los un crenchi den baile riba ritmo di musica oldies den background.
Lady Ruth ta gusta e temporada di anjanan setenta. Algo leuk tawata, cu na entrada nan tawata regala tur bishitante un saco of un tasje cu algun cosita den dje, e.o. un casino voucher di 10 dollar y Lady Ruth y Verna a dicidi di bay tira un bista den e casino y nos a inscribi y hanja 10 dollar regalo riba e otro 10 dollar y nos a bay sinta hunga ranka jackpot pa algun minuut y pasa hopi pret mes. Lady Ruth a dobbel su dollarnan pero a sigui ranka jackpot te ora e tawata na zero. E cos ta, cu nos no ta gusta casino. Nos a disfruta di nos vodka orange juice drink, saca pics y sali bek for di e casino tur na harimento, laga varios di nos adultonan mayor ta ranka jackpot.
Tratando e tema di nos grandinan, tin cu bisa cu duele y dolor na mi curason, cu nos mester a entrega un carta di keho contra nos Horacio Oduber Hospital pa servicionan cu no a bay bon cu nos mama durante e siman cu ela wordo opgenomen durante cual siman su sucu a baha hopi mes varios biaha y niun dokter di sala of specialista no a bin wak e riba mi peticion pa auxilio, pero ta duna opdracht fei distancia pa sigui dune infuus di 1, despues di 2 liter,bolbe cambia, yena cu glucose, mientras mi mama kier a come, e tawata bisami e tin hamber, e tin sed y e contesta di e zr nan ta no, ta hasi loke dokter di sala ta bisa, pero no a bin wak mi mama niun dia den e henter siman cu mi tawatatey tur dia pa oranan largo , tin biaha di 11.30 am te 8 pm di anochi ( Si a pasa mainta tempran mes prome cu mi a yega durante e oranan di bishita, no ta laga sa nada y mi a pidi varios biaha ).
Mi a wak e coi midi sucu cu mi mesun wowonan. Nan tawata duna infuus y hopi calmante tur dia sin un splicacion di un dokter pa kiko asina hopi te cu mi mama no por a come ni guli bon mas, ora ela drenta hospital e tawata come y bebe. Mi curason ta ketobay dolor cu mama awor delicado bek na cas, saka despues cu mi a reclama ? Despues di 6 dia porfin a logra hanja un familiegesprek, pero ya e danjo fisico y mental a wordo hasi caba. No pa papia mes di su herida na su stuit cu tambe tawata mehorando bon cu bon cuido di WGK , a sali mas malo .Mi mama cu su crenchi dementia y alzheimer a wordo pusha cu infuus, glucose y pilder di calmente pasobra e tawatatin su momentonan di grita grita, algo normal pa patientnan di alzheimer. Ela drenta hospital pa algo di tripa. Lamentablemente nos tin dokternan cu ya a cuminsa practica e wega di AI (Inteligencia artificial) y kier duna instruccion foi distancia sin wak e patient. Tin bon dokternan cu roeping, yamada for di ariba y tin dokternan di status cu pasobra tin amigonan dokter nan tambe kier bira dokter. Doktertje spelen ta otro cu ta un dokter di curason y alma. Si bo no tin amor pa bo prohimo no bira dokter riba papel, pasobra bo lo faya den practica. Lady Ruth a tende di mas hende cu a pasa mal ratonan den hospital, pero cu no sa mucho bon con pa yena e formularionan di entrega keho y ta drumi cu e dolor cu nan a pasa aden. Dios ta duna bida y Dios ta kita bida.
No un dokter pa schrijf af nos adultonan mayor. Lady Ruth su curason a papia. Danki pe atencion, pasa un bon dia yen di sabiduria den nos alegria. Nos tambe sa cu nos tur tin cu muri un dia, nos no tin cu rek manera cakinja pa nos egoismo y entrega bek na Dios e regalonan precioso di nos mayornan duna na nos. Awor ta mama y papa tin kebrante di salud, pero no lo bay hospital cu nan, pasobra enves di yuda bira mihor of bon, ta neglisha y laga nan pa nan cuenta. Nan ta awor den man di Dios, nan bon dokter di cas, di Wit Gele Kruis y di famia, manera prome cu a hiba mama hospital. Semper den man di Dios prome cu tur cos y cada ken cu su mesun consenshi. Danki na varios di e broedernan y zrnan cu si a trata mi mama bon riba piso 2 di Tower A. Danki na e zr cu a hasta canta pa mi mama y esunnan cu si a purba di criye cu cuminda ora mi a baha abao of mester a bay cumpli cu algo otro familiar.
