One day at a time. Un dia a la ves. Dia pa dia. Lady Ruth a usa e palabranan aki hopi, pero hopi biaha mes y awor e tin mas peso aden. Nos sa awor cu mas y mas e nificacion di e palabranan Dia pa dia, ta asina importante cu hopi berdad. Nos curason no ta sinti pa bayla ainda, nos no ta sinti pa kanta kareokee tampoco ainda. Nos sa awor kico e ta pa despedi di un mama. Ora cu e tristesa a bati na nos porta, cu nos no por a evita. Nos no ta sinti rabia pa locual a sosode den hospital HOH cu nos mama durante e siman di 30 di September te cu 7 di Oktober 2025. Nos ta pordona. Nan tin cu pordona nan mes. Nan no sa con pa pidi pordon pa nan negligencia den trato di un patient. Nos ta sinti cu nos tin cu expresa pa pueblo sa, cu, no ta tur dokter ta dokter di berdad. Nan por tin e pida papel, pero no e curason. Nos no a pensa di dje dia 25 di Oktober ora nos a despedi di e curpa di nos mama, cu awor su bunita alma serca Tata Dios den paz, amor y lus eterno. Pa un motibo of otro, ela bolbe na nos mente despues di nos despedida di nos mama. Mi tin cu hasi algo, pa mas di nos grandinan no pasa den locual mi mama a pasa aden. No por ! Ta basta di “schrijf af” nos grandinan ! Mi mama por a keda cu nos un crenchi mas, ken sa, un anja, dos anja of hasta mas, si nan no a pusha mi mama cu asina tanto infuus y glucose, tratando su tripanan. E tawata bisa cu e tin hamber y sed, pero dokter for di distancia tawata duna ordo pa sigui dune mas infuus y mas glucose. Mi mama a drenta hospital ta come y a sali cu un stroke y sin por come mas. Niun dia ora su sucu tawata baha di 1.4 of 1.9 y tin bes e machien no tawata mustra nada mes, niun dokter di sala of specialista a bin wak mi mama. Mi tawata na hospital companja mi mama tur dia, tin biaha di 11.30 am te cu 8 or di anochi of di merdia pa atardi, bay bin bek. Ach, nos ta den tristesa pero cu inspiracion di un forsa pa informa pueblo un crenchi di locual a sosode. Nos ta en espera di e klachten comissie su yamada pa papia. Mi mama ta na pas, e ta drumi dushi den cas celestial y ami como su unico yiu muhe ta sinti e Poeta den mi ta sclama pa protesta contra personanan cu ta scoge pa bira dokter, pero cu no tin e dedicacion ni e yamada pa e trabaonan di un dokter. Nan ta dokter di “status”, di ganja ganja, monkey see monkey do, pasobra awendia ta asina facil pa bira dokter riba papel cu un tiki training pero cu no ta interesa den e patient manera nan ta priminti, pa cuida y cura, pa yuda cura y of salba nan patient. No ta algo cu mi ta chupando for di mi dedenan, ta cos cu mi wowonan a mira. Un otro patient a bisami cu e dokternan hulandes ta bin aki bandanan pa e klima y lama y ta presenta na trabao ora nan kier ? Podise ta pesey ora porfin a logra di papia cu un dokter di sala, su cara cora kima di solo ?
Parkeer nan auto, hasi comosifuera nan tey den hospital, mientras nan ta un otro caminda ? Dicon ora tin mester di un zaalarts of un specialista di piso, nan ta “druk”? Druk pushando otro patient cu infuus of glucose? Lagami muri na mi cas anto, y no como un number riba nan file, pasobra nan ta pasa mas tempo tras di nan laptop ta skirbi, ken sa, inventa cos cu nan ta kere nan mes ?
Podise un persona mas adecua cu Lady Ruth, por cuminsa tuma yamada di patientnan grandi di edad of nan famia, pa conta nan storia con malo of con bon nan a wordo trata ? Nos tambe ta contento cu tin bon dokternan cu si ta tuma tempo serio pa sigui e trato su desaroyo di nan patient. Nos a entrega keho na HOH y na IVA. Ma comprende cu tin un con yama Tuchtcollege of ta Tucht afdeling tambe ? Locual a sosode cu mi mama ta hopi di lamenta, mi sa cu nan no por duna bida bek na mi mama, cu si, den mi humilde opinion como cuidadano adulto mayor, a purba di hasi danjo, conciente of inconcientemente of pa falta di sinti of no sa nan mes kiko pa hasi y nan ta “guess” pa cu e estado di salud di mi mama ? No tin team work ? Algo pa pensa di dje y of papia di dje den seno di nos grandinan ? Nos ta ripiti : Dokter NO ta Dios ! Ta Dios ta duna bida y Dios ta tuma bida, segun su boluntad na tera como na shelo. Por tin mil y un bunita conferencia di dokter, enfermeronan y of specialistanan. Bla bla bla, papia so no ta yega niun caminda. Puntra bo mes como dokter : “Mi curason ta na e bon lugar ? Mi ta stima mi prohimo pa yudele of pa maltratele ? Nos ta lage te akinan pe siman aki. Nos ta den nos proceso di healing di nos tristesa, pero nos Dios no ta drumi. Mi a sinya di mi bunita y dushi mama, cu, tin cos pa hende regla y tin cos pa Dios regla. Cada ken cu su consenshi, si e tin un . Danki pa lesa nos relato di e siman aki, si e ta mucho fuerte pa bo, lubide. Si ba sinya algo di dje,por fabor compartie.
Pasa un bon dia yen di sabiduria den nos alegria, cu actualmente ta man den man cu tristesa y dolor. Un bearhug di Lady Ruth.
