Despues cu recientemente nos a despedi y entrega nos bunita y dushi Mama bek na Dios di amor Jesus y Angelnan wardador a bin busca nos tata Lucas Leonardo Francisco Bergen pa ta reuni cu nos Mama den e Reino Celestial. Nos curason ta tristo, pero gradicido pa tur locual nos Papa a nifica pa nos. Nos consehero , nos mihor amigo, nos mecanico, nos inspirador. Un esposo ehemplar , a stima nos mama incondicionalmente ! Nos no por bringa Dios su boluntad den nos bida, E tin tur cos den su man.
Tristeza ta bay man den man cu alegria un bes mas y e Poeta den mi, e Poeta Lady Ruth a expresa su mes den varios poema publica den e prestigioso medio di comunicacion aki. Awe nos ta dedica nos relato na nos tata cu hopi amor y carino. Un homber directo, honesto hopi responsabel. Un homber cu ta gusta scucha y canta cancionnan mejicano. Ta hopi biaha nos a sorpresa Papa cu un Mariachi riba su cumpleanos. Papa ta gusta wak baseball, pero ta futbol e ta gusta mas. Su team favorito Barcelona. Tempo di su tempo, anjanan pasa, Papa tawata hunga biljard cu mi ruman hombernan y cu amigonan, mientras Mama, Mirla y Ruthy tawata sinta wak, bebiendo un dushi cerbes bon friuw. Tambe nos Papa tawata bay tira pisca cu su suanan como hobbie.
Nos a keiro riba crusero cu nos mayornan varios biaha hunto cu nos ruman homber mayor Roy, Ro y Mirla, Johan y ami y pasa dushi. Papa Lucas a traha 35 anja den Labaratorio na Lago y despues cu penshoen a yuda Hagemeyer den accounting y tambe ela traha pa un tempo na Mercedes Benz. Ruthy a traha un buki specialmente pa Papa su di 80 cumpleanos cu hopi potret y poema dedica na Papa .
Dia 18 di Oktober 2025 Papa Lucas a cumpli su di 93 cumpleanos. Papa a studia y obtene su diplomanan den Computer advanced internet na Ensenjanza pa empleo, ela obtene su Praktijkdiploma moderne bedrijfsadministratie, Praktijkdiploma Boekhouden, diploma di International Correspondence Schools Scranton Pennsylvania den Radio and television servicing, International Correspondence Schools Scranton Pennsylvania den Automobile, National Technical Schools Los Angeles California diploma den Air Conditioning, Refrigeration and Electrical Appliances Master Course. Tur esakinan mientras e tawata trahando den Lago como e Supervisor di e supervisornan den Labaratorio. Siiii, nos tata Lucas Bergen, un homber bendiciona yen di sabiduria a yuda unda e tawata por y a salba bida di dos persona , un na trabao den Lago y un den accidente di trafico. Merecidamente nos Papa Lucas L.F. Bergen a wordo condecora cu un Lintje in de Orde van Oranje Nassau, tempo di gobernador Fredis Refunjol.
Diasabra dia 8 di November 2025 , bispo di nos ruman homber Ro su cumpleanos, nos lo tuma despedida di e curpa di Papa durante oranan di mainta 9am -11 am na Royal Funeral Home. Por duna condolencia e mainta aki, y despues lo tin cremacion den seno familiar. Nos ta lamenta cu nos no por tuma bishita di condolencia na cas. Danki pa boso atencion cu amor pa nos famia den e dianan dificil aki. Papa awor serca Mama den e Reino Celestial, rondona pa mas amor, paz y lus eterno. Papa y Mama, awor mas serca di nos mente, alma y curason.
Danki Papa pa tur cos !Brasa nos Mama pa nos, y sigui goza hunto den nubia y shelo, rondona pe streanan di lus, den Reino Celestial y lus eterno. Papa, e Poeta den mi kier grita sclama ! E Poeta den mi kier yora cu gradicimento pa tawatatin mayornan asina dushi, ehemplar cu nan stimacion incondicional pa tur nan 4 yuinan, nan nietonan y nan bisanietonan. Payo cu Mayo hunto, como un curason y un alma precioso . Dios ta bon. Dios semper ta bon y Dios ta amor. Drumi dushi Mama y Papa.
