Lieve mensen, “Bon dia yen di alegria !” Nos tambe a bay disfruta di Djiespies Happy Hour Diabierna ultimo y a sinti un crenchi e ambiente tambe di e actividadnan “Ban bek caya”, ya cu tawatatin un otro banda musical tocando un crenchi pabao di Djiespies. Mientras e publico di custumber tawata bailando riba e dushi ritmo y melodia di e banda musical Azucar cu Robert Maduro, un otro banda tawata toca un crenchi mas pabao. Un dushi sorpresa ora cu varios grupo di bayle a bin duna nan bunita presentacion pa e publico di Djiespies, bisti den nan trahenan folklorico colorido masha bunita mes. Manera ta e tradicion y custumber nos amigo e gentil cabayero hulandes cu curason arubiano Wim Steenhuis a cana meymey di e publico pa saca potretnan bunita. Tawata dushi pa wak e publico baylador bayla riba e ritmo contagioso super alegre di “The lizard kacking”toca pa e banda musical Azucar. Awe nos ta relata tambe un crenchi di e expo “AKI” na RAA Studio ( Residencia Artistico Aruba) cu nos a bishita Diasabra anochi prome cu nos a bay Grupo di Oracion na Modanza cu Vidente Valerie. Nos por a admira varios obranan impresionante pinta pa e artista Sharina Gumbs, e.o. su Mother Title art work “Silent Power” y su cuadra cu inspiracion pa cu su tata titula “ The lion that didn’t roar”. Nos a yega net na ora pa a mira y goza di un super nice presentacion di e artista Tuesday Irwin titula “ Shades, Shifts and Stilness” . Lady Ruth ta traduciele liber : “Sombra, cambio y quietud “.
Tuesday a hasi uso di full su curpa y expressionnan facial, moviendo pafor y paden di un boto durmiendo den e boto moviendo poco poco zoyando, un bunita boto obra artistico di e artista Dimanche Jolie. Tuesday no a papia bisa niun palabara, a actua den silencio cu su formanan cu full su curpa y cara paden y pafor di e boto. Demas artistanan cu tin obranan den RAA Studio na unda antes tawata Muchila Creativo ta : Ginelly Quant, Rudyo Leysner y Rudberth Wolff. Mientrastanto un otro siman a pasa sin ricibi e carta di HOH nan Klachtencommissie. Lo ta hopi dificil pa nan stel op un carta pa nos ? Tin algun hende cu a bisa nos, no conta riba nan, nan no ta confiabel y ta tuma hende hasi cu nan Hoorzitting just pa formalidad den bista di pueblo, pa mustra cu nan ta duna un crenchi atencion, pero nada ta di curason. Enfin, no ta na ami nan tin cu prueba cu nan por mihor, ta na henter pueblo di Aruba, specialmente na nos adultonan mayor. Nan no por trese mi mayornan bek na bida ni e otro patientnan cu tambe a pasa malo bao nan man. Stranjo si cu nan ta bisa di ta bay manda nos un carta y te ainda nada no a yega serca nos. Enfin, ta nan consenshi no di mi. Ban ta serio si. A dura 3 luna prome cu e Hoorzitting a tuma lugar, lo tuma nan 3 luna pa skirbi un carta pa nos ? Uffffff……..Nos ta conclui nos relato mandando saludos pa nos dushi hendenan di nos grupo di Oracion na Modanza. Nos por a scucha Vidente Valerie duna bunita testimonio di su bida asina bunita y impactante. Dios sa pakico cos a bay manera ela bay, Dios tin tur cos den su man. Tin hende cu ta spanta pa cambionan tuma pa mihor bida, si nan mes no a pasa den momentonan dificil y sa core huzga sin por tira e prome piedra. Valerie ta un hende muhe empodera cu hopi sabiduria y curashi. Y cu hopi amor pa su prohimo ruman. Nos ta un grupo di fe y bendiciona. Un grupo di hopi amor. Lady Ruth ta asina contento di a hanja un grupo cu ta comprend’e y cu ta stim’e tambe, manera e ta stima nan. Un famia aserca. Na ruman Bubu, corda trese bo guitarra otro biaha pa nos sigui cu nos serenata pa nos dushi grupo. Hendenan humilde y sincero, respetuoso y gradicido pa cada les y cada experiencia den bida. Cu Dios sigui drama su bendicion ariba cada un fiel siguidor di The Voice of Jesus cu na cabez cu curason nos bunita y elegante hende muhe fuerte dynamico y semper ilumina y inspira, Vidente Valerie.
Corda cuida e salud y duna bo grandinan atencion cu tempo di calidad. Un dia nobo cu oportunidadnan y bida nobo. Nos niun tey pa semper.
Manera e bunita cantica ta bisa :” One day at a time”. Un dia a la vez. Pa esnan interesa lo bay tin un workshop di traha collage artistico di papel na RAA Studio diasabra 7 di februari di 4 pm pa 6 pm atardi duna pa e maestro di arte Patrick Mallison di United Kingdom y actualmente na Aruba. Un “bearhug” grandi diki gordo pa tur nos fiel lectornan y pa pueblo di Aruba !
Ban goza di carnaval 72 cu no tin dos mescos sanamente cu hopi alegria y respet pa curpa !
