Ahaaaaaa! Un lector cu ta lesa cu atencion a comunica cu nos y bisa nos cu e periodista profesional di tempo di Radio Carina di anjanan ochenta, Angel Kirchner, ta na bida ainda gozando di su edad crenchi halto, mientras nos a pone tras di su nomber (dfm).cual a sali den nos relato publica dia 2 di September ariba pagina 13 den Diario y riba un otro fecha den Solo. Nos ta rectifica y nos ta pidi nos disculpa pa esey, Angel Kirchner ta meymey di nos ainda y ta gozando bida cu su sernan stima. Un bearhug ! Nos a bruha cu Angel Coronel cu si a bay nos dilanti no mucho tempo atras. Lady Ruth ta corda tur dos Angel. Angel Coronel tawata activo tambe filmando e diferente festivalnan di Bon Bini na Willem III toren Fort Zoutman ainda algun tempo prome cu nos no a topa cu ne mas. Beter laat dan nooit, nos condolencia, consuelo y amor na e sra.esposa di Angel Coronel y demas famianan y amigonan colega den media. Prensa a perde un trahador dinamico di hopi inspiracion.
Kedando riba e tema Prensa, den un otro tono mas alegre, nos kier a felicita nos amigo colega den Prensa, trahando ya pa hopi anja na Diario, e gentil cabayero Nilton Lacle, un tremendo periodista y tambe un super bon fotografo bibito bibito.Un di nos dushi hendenan, un arubiano original, guapo, talentoso y hopi sabi. Un shon di hende cu ta stima su trabao cu e ta eherce seriamente cu pasion y creatividad. Lady Ruth e poeta expresando di su curason. Nos a inspira un poema acrostico cortico cu su nomber como un sorpresa p’e riba Dia di Prensa 1 di September 2024 cu ya ta trai lomba, pero cu e trabao den prensa ta tur dia, kemen, nos por comparti e poema aki tambe den nos relato di e siman aki. Permiti Lady Ruth dedica e poema aki na Nilton Lacle cu hopi amor y carino y gradicimento pa su excelente bon trabao :
N ilton Lacle, profesional cu curason den periodismo
I mportante p’e ta su yiu homber Mitchell su felicidad y su estudio
L uz, amor,salud, alegria y sabiduria di bendicion tur dia
T rankilidad, pasenshi y hopi bunita energia cu ta pone tata y yiu briya
O ra cu solo sali, duna su calor, e biento fresco ta rondona nan cu amor
N ada mas bunita y mas grandi cu sigui accepta cada dia den gracia cu splendor
Den un otro tono alegre tambe, tambe di gradicimento, nos ta menciona dos otro miembro dinamico di Wit Gele Kruis, kendenan tambe ta hasiendo nan trabao cu hopi amor y carino den nan cuido pa cu nos grandinan.” Janine y Rachelle”. Lieve Janine y Rachelle semper ta bay “the extra mile” den nan servicio pa cu nos grandinan cu no por hasi tur cos nan so mas pa motibo di balans of algo den nan salud cu ta impidi esaki. Nan ta focus y concentra ariba nan trabao pa keda cla pa por sigui atende mas cliente riba e lista di e dia ey. No tin tempo pa combersa hopi cu nan, pero nos a logra saca un bunita pic di nan dos para bao e palo di mango den cura. Danki lieve Janine y Rachelle y full e team di Wit Gele Kruis pa boso excelente bon trabao.
Shonnan tur, danki pa lesa nos relato cu atencion y curason. Nos ta contento di tende comentarionan positivo cu ta sigui inspira nos sigur . Pasa un bon dia yen di sabiduria den nos alegria ! E alegria cu ta bay man den man cu tristeza. Corda bishita bo grandinan, combersa cu nan, bisa nan bo ta stima nan awor na bida. Un “bearhug” grandi pa tur nos fiel lectornan di e relato semanal di Lady Ruth.
