Awe nos ta bay bek den tempo un crenchi. Pa nos relata toch un crenchi di dos bunita actividad ya tray lomba, pero ketobay den hopi curason. Tempo ta casi bula pasa nos voorbij. Nos a bishita e expo di Leo Vrolijk, un di nos dushi hendenan original experto fotografo y cameraman pa hopi hopi anja, algo cu a keda un crenchi den su famia, awor cu su yui homber tambe activo ariba e tereno aki di saca potret y di filma.
Tawata un anochi sublime cu un sala di expo yena di hopi bunita potret di tur tema y topico di tur sorto y di hende. Cada un a capta nos atencion sigur. Ora nos a yega ya e ceremonia oficial a pasa cu entrega di premionan di plakaat di glas na varios di esnan cu a destaca den nan trabao di saca potret, sea como periodista of trahando riba nan mes. Nos a topa cu famia Theo y Rosemarie de Jong , e cabayero cu a traha hopi anja den turismo si mi no tin hera, su yui homber cu segun mi por corda, ta carga e mesun nomber cu su tata, Theo Jr. un amante profesional tambe sacando su potretnan bunita di temanan cu ta impactante p’e.
Theo de Jong Jr.tambe a ricibi un plakaat di glas e anochi bunita aki den Biblioteca Nacional durante cual tur presente por a saborea un wijntje y un super dushi snackbox yena rand rand, traha cu hopi amor y carino pa e bunita ruman muhe di Leo Vrolijk, Eta Thiel, un reina den cushina cu sa traha dushi snacks, bolo y cuminda pa tur occasion. Hopi lekker mes e snacknan tawata ! Nos hasta a hanya un snackbox extra cu Lady Ruth por a hiba cas pa su casa Johan. Pabien Leo Vrolijk cu otro fantastico expo “E lens di mi wowonan”, proyecto realisa cu ayudo di varios patrosinadornan, entre otro, atrobe RBC Bank cu ta sponser mayor di e proyecto aki di Leo Vrolijk ya pa hopi anja tras di otro.
Manera lectornan por lesa “on and off”, nos sa publica varios relato di Djiespies Happy Hour di Diabierna anochi, ora salud y tempo permiti nos di bay goza un crenchi cu e dushi bandanan e.o. Nos cu Nos of Azucar. Durante un di e dushi Djiespies Happy Hournan nos a topa cu e simpatico Domi Peter Hazenoot y su dushi y bunita famia y amigonan baylando cu smak, pasando un dushi tempo hunto. Un Domi cu su predicashinan super bunita den Kerki chikito na Piedra Plat. E gentil cabayero Domi Hazenoot un persona hopi stima pa su congregacion.
Un cabayero humilde cu su bunita curason ilumina cu hopi bunita energia den su fe tur Diadomingo mainta cu sirbishi na Hulandes y atardi sirbishi na Papiamento. Bunita cu grupo scout Kimball O”Hara por tene nan reunionnan tur diasabra atardi den un di e baraknan pafor den cura di Kerki na Piedra Plat. Lady Ruth a bayla un cancion cu Domi Hazenoot tambe e Diabierna anochi aki, holooo ya ta casi un luna pasa sin ta mas cu un luna , cu ta awor numa ta hanja atencion pa motibo di hopi tema y actividadnan cu nos ta desea di relata di nan. Tawata reina un dushi ambiente hopi alegre den su grupo di famia y bishitantenan di afor, cu sigur a pasa un bon tempo hunto den hopi alegria. Danki pa lesa nos relato cu atencion atrobe, deseando un y tur un bon dia yen di sabiduria den nos alegria cu salud y hopi sabiduria.
Un bearhug grandi diki gordo di Lady Ruth pa tur nos dushi fiel lectornan cu ta duna nos bon comentario pa cu nos relato di curason. Sigui duna bon Dios danki pa tur cos tur dia ! Ta duel nos cu nos no por atende tur actividad social cultural y of musical tur biaha cu nos wordo invita, pa motibo di prioridadnan den famia, pero ta hasi nos best pa atende ora cu por. Nos kier a felicita e colonia Colombiano ainda cu nan festividadnan, e.o. esun cu a tuma lugar na Centro di bario Brazil recientemente cu hopi dushi ambiente cu nos por a wak ariba fb. Tremendo grupo di bayle ! Y bunita arte ! Un brasa pa mi amiga Martha Lopez y Monica Florez. Un brasa pa amigo John Fredy Montoya cu ta sigui inspira tur rond di dje cu su bunita talentonan ! Pabien cu boso Dia di Colombia, boso prome cas. Danki pa aporta y stima boso di dos cas, Aruba !
