Y…….boso tambe a keiro un crenchi den auto, core admira e rotondenan bunita na luz ? Lady Ruth ta super super contento cu su poemanan di Pascu cu ela skirbi pa su mayornan awe dfm a bolbe bira un bunita cantica cu nos a share ariba facebook y ariba whats app cu nos amiga y amigonan cu ta aprecia e talentonan di Lady Ruth. Danki pa e motor tras di e obranan aki, nos bon amigo Dr. Ike Posner, un cabayero all out y hopi talentoso, activo den su tempo di penshoen al momento. Pero ya nos a mencionele y pon’e in het zonnetje den nos relato di siman pasa. Wel, mi curason ta alegra y gradicido pa mi talentonan di inspira y skirbi bunita poemanan cu ta bira un cancion cu ta toca curason. Boso tambe sa wordo molestia cu personanan desconosi cu kier usa boso profile picture bao di nan nomber pa habri un account na nan nomber ariba fb ?
Corda shonnan, Ruthy Vrieswijk tin un account so ariba facebook cu un bunita potret di su mayornan tempo nan tawata hoben y enamora. Nos no sa con druk nos amigonan den prensa lo ta otro siman, pesey laga nos cuminsa gradici nan for di awe caba, awor cu no falta mucho dia mas pa nos celebra e nacemento di Ninjo Hesus hopi anja pasa, atrobe den un otro Pascu. Na Diario e gentil cabayero Nilton Lacle, na Awe Mainta e carinoso sra. Marilu Koolman-Maduro, na EANEWS e simpatico Farrah Boekhoudt, na Extra Bonaire e homber serio Boi Antoine , na Solo di Pueblo lieve Sandra Suarez cu ta forward mi poemanan pa nan y tambe danki na e semper inspira e cabayero Babu Hoek cu su MasNoticia.
Un poema cu a hanja hopi atencion y reaccion ta mi poema Un carta cu a wordo analisa profundamente den e idiomanan hulandes y ingles, pa a hala mas atencion di e mundo medico pa nan no neglisha patient di edad halto mas. Pa nan trata tur patient , tambe adultonan mayor, cu e debido trato y atencion y cu respet. E klachtencommissie di HOH a pidi extension di 4 siman pa nan por rond af nan investigacionnan. Ora ta asina lew pueblo lo tende con a bay. Ketobay nos ta topa cu personanan riba caya, den fastfood restaurant y na oficina di dentista cu personanan cu ta conta nos nan testimonio con nan grandinan a wordo trata, cu no ta un trato di gaba. Enfin, nos ta felicita HOH cu nan bunita jingle di Pascu canta pa Jeon cu algo di salud na bo salud ? Awe Diasabra anochi trahando e relato aki, nos ta tende den nos curason e dushi y bunita cantica di Juan Luis Guera “Ohala que llueve café en el campo” , sperando cu e concierto tawata uno exitoso atrobe di e grupo Elite Entertainment.
Naaaaah, nos no ta bay actividadnan asina mas, nos ta malcria den nos dushi ambiente na cas, suchando Alexa. Hasta Mama Amy a enamora di Alexa su musicanan dushi ! Danki lieve Amy y Sharlyn pa e dushi anochi di ayaka serca nos y tambe un danki na Nilton y Ann, mi amigonan fey den prensa di hopi anja pasa, pa nan bishita tambe serca nos, nos tradishon di tur anja, sinta “catch up” y saborea un dushi ayaka. Den un dushi ambiente na cas, nos ta aprecia esaki masha hopi mes. Lady Ruth y su esposo Johan, na caminda pa celebra nan di 48 anja casa felismente cu su ups and downs, su lesnan y experiencianan den hopi dushi momentonan hunto den y cu famia, dia 21 di e luna aki di December 2025. Nos ta sigui duna Dios danki pa tur tur cos, pa cada dia yena y colma cu alegria cu ta ruman di Tristeza, manera e bunita cantica dedica na nos Papa cu Mama, cu por wordo scucha ariba Ruthy su facebook page. Danki na abo, lector fiel di nos relato semanal “Sabiduria den nos alegria” pa lesa locual nos curason inspira pa comparti. Danki pa tur bon comentario ricibi. Nos ta aprecia nan masha ! Na boso tur, dushi dianan y momentonan di preparacion pa cu Pascu y Anja Nobo 2026 ! Corda bisa bo sernan keri cu bo ta stima nan ! Un “bearhug” di Ruthy Lady Ruth pa boso tur !
