Un bon dia yen di sabiduria den nos alegria ! Shonnan, ban sigui stima den amor despues di e dia di San Valentino cu tawata dia 14 di februari ultimo. No laga e amor stop eynan. Usa e chispanan dushi di carino y ternura pa sigi inspira bo dia pa dia. Y ban sigi goza di bida cu alegria tur dia despues di nos parada grandi di Carnaval di Diadomingo ultimo. E alegria di tin bida y salud, e alegria di tin un famia y of e alegria tambe di tin un trabao y talentonan artistico pa sigi expresa den e dushi alegria ! Ni maske Lady Ruth tin su momentonan di tristeza ainda cu e fayecimento di su mayornan 4 luna pasa, e sa cu nan ta trankil na paz den amor y luz eterno.
Su alegria ta continua dia pa dia pa su esposo, yuinan, nietonan y rumannan, demas famia y amigonan. Bida ta sigi brinda hopi cos bunita. Asina tambe nos a bay Cede di MEP dialuna dia 9 di februari ultimo pa celebra cu nan, nan di 55 anja di existencia cu charlanan interesante y impactante encuanto nos Status Aparte cu e anja aki ta celebra 40 anja. Un sala completamente yen di famia y amigonan, votadornan, simpatisantenan di e famia grandi di e partido politico MEP. Manera ta e tradicion y custumber, e simpatico Sandra Croes a fungi como e MC y elegantemente a guia e programa na un manera sublime. Sandra su vocabulario y articulacion ta un waaaw ! E prome orador presidente di e partido Mep e gentil cabayero Ricky Hoek a dirigi palabra pa habri e anochi den un forma super nechi, inspirativo y educativo clabo riba cabes, bisa cos manera nan ta, sigur pa e generacionnan nos dilanti cu tin cu sigui den nan sapatonan un dia.
Despues Lady Ruth a wordo invita pa subi escenario pa recita su poema “Pabien Mep cu 55 aniversario “ cu a cay na bon tera serca tur presente. Un poema cu a nace un dia prome den oranan di 12 or di mey anochi marduga segun e inspiracion a drenta su curason scuchando dushi musica di Jim Reeves di Alexa. Despues nos por a scucha Nel Oduber prome riba un grabacion video cu audio y despues scuche tambe live cu chispanan encuanto e trabaonan y tempo balioso di Betico dedica na e logro di Status Aparte , cu tawata e corona di e carera politico di Betico Croes kende despues di un tempo su tras a fayece lamentablemente. Nos por corda e tempo tristo ey. Nos por a scucha di e reunionnan y trabaonan eherce cu y of na Hulanda encuanto realisacion di nos Status Aparte, cu segun nos por a comprende ta dia 12 di Maart pa ser mas exacto, pero 18 di maart a wordo escogi pa e gobierno pa un of otro motibo.
Ach, shonnan, discursonan politico nunca tawata Lady Ruth su koekie . Nos ta den e grupo di nos hendenan simpel, original y humilde cu tin cu hanja extra splicacion di e.o. un pakico di un Rijkswet etc. Y si tin mas palabranan grandi na e idioma hulandes, pio atrobe. Danki na Betico cu nos a hanja nos Status Aparte pa tur e otro cosnan por a cuminsa cana pa mehoracion riba nos isla. Nos bandera, nos hymno, nos escudo, nos cultura y nos idioma Papiamento, nos economia y hopi mas. Locual a resalta den nos poema e anochi aki den Cede di MEP ta tambe e palabranan “Baas den nos mes cas”. Tawata reina un dushi ambiente cu hopi applauso pa nos oradornan Nel Oduber y lider actual Evelyn Wever Croes kendenan a hasi un tremendo bon papel. Ta hendenan stima den pueblo di Sta Cruz y henter Aruba.
Danki na e comishon organisador di e bunita anochi aki, un anochi hopi agradabel cu hapjes y coi bebe y hopi sacamento di potret. Bunita pa a saluda Kenneth, e esposo guapo di Evelyn y Shon Hendrik, e tata di Evelyn kendenan sigur ta hopi orguyoso cu e bendicion cu su bunita sra esposa y yui muhe ta pa famia Wever Croes y pa Aruba. Te aki un chispa chikito asina di e celebracion dobbel cinco di Mep, Movimiento electoral di pueblo y ainda falta. Danki pa lesa nos relato cu atencion ! Un “bearhug” di Ruthy Lady Ruth Vrieswijk.
