Saludos lieve mensen ! Spera cu tur cos ta bon cu e salud y cu famia. Manera priminti, awe nos relato encuanto un dushi anochi inolvidabel dedica na Joyce Pereira, un homenahe na un dama cu gusta studia y profundisa su mes den nos dushi idioma Papiamento. Recientemente su famia, coleganan den e ramo di nos lenga materno Papiamento y algun amigonan a bini hunto den “Cas di Papiamento” completamente yen, pa a duna Joyce Pereira un bunita homenahe pa tur su bunita trabaonan, dedicacion y logronan den su bida te cu awor, ketobay yudando segun peticion, personanan cu nan documentonan, bukinan y of otro proyectonan cu tin di haber cu nos idioma Papiamento.
Entre otro a hiba palabra di elogio y aprecio pa Joyce, sra. Swinda Maduro Schwengle,e curason y motor tras di e bunita anochi aki, sr. Ramon Todd Dandare cu a fungi tambe como e MC, sr. Wim Rutgers y algun persona mas. Nos como e Poeta di pueblo a laga mi casa Johan graba mi recitacion di un poema, scirbi y dedica na amiga Joyce pa cu e occacion bunita aki . Nos a email e pa sra. Swinda cu a laga hinka e poema aki den e programa e anochi ey, cu otronan tambe por a wak y scucha ful e programa na cas via un link. Nos kebrante di salud no a permiti nos tey presente en persona. Ramon Todd tambe a recita algun bunita poema e anochi ey y tur e oradornan a papia cosnan bon y bunita di Joyce.
Nos no por keda sin felicita Joyce cu a habri e anochi cu fragmentonan, notanan di su presentacion di su estudio hasi pa su titulo di dr. adkeri, masha pero masha interesante y impactante mes. Nos tur por sinya di Joyce. E caminda pa yega unda ta desea di yega a tarda, tawata largo cu cambionan di ministernan di ensenanza cu tawata kita pone kita pone, pero segun nos por a comprende, tin lus atrobe na horizonte pa cu nos lenga materno y nos muchanan na scol. Enfin, nos ta clausura nos relato di e siman aki cu nos poema dedica na Joyce Pereira, un dama nechi elegante hopi pero hopi sabi cu un curason di oro. Un shon di hende cu ta bisa’bo e cos manera e ta. Serio, sincero, directo cu hopi bunita lus den su bunita alma. Danki lieve Joyce, pa bo amor y dedicacion asina grandi pa bo isla Aruba y pa nos idioma.
Pa Joyce
Combersando cu mi casa algun siman pasa
Mi tawata bis’e con bendiciona mi ta
Pa tin bon amiganan di tur edad, di tur raza, di tur religion,
di tur profesion, tur nivel, amanan di cas, den tur skina di Aruba
Cu mi ta contento di por ta amiga cu un Dr.
Cu titulonan academico bunita
Pero cu su curason mas bunita cu e titulonan
Cu mi ta sinyando hopi di dj’e
Cu mi ta admir’e, apreci’e y stim’e
Awe mi kier felicit’e cu e homenahe bunita duna na su persona
Cu ta sona bunita y bon mereci
E ta un hende muhe bunita cu un bunita alma
cu mente fija riba locual ta bunita y bon
Un ser precioso cu bon curason
Danki Joyce Pereira pa tur bo dedicacion
den bo trabao y awor como penshonado voluntario
Den tur locual tin di haber cu literatura y nos dushi papiamento
Amiga, sea semper contento !
Y gradicido pa bo rikezanan na salud y sabiduria !
Sigui goza bida cu alegria
Sigui inspira tur ,tur rond di bo
Dios ta wak y sa ,e conose bo pasonan y cada movecion
Pa gracia e ta manda’bo cada dia su bendicion!
