Y asina otro bunita celebracion di nos Dia Nacional a bay laga nos cu hopi bunita recuerdo atrobe. E biaha aki ora di keiro rond den auto den e diferente districtonan por a wak varios bandera di Aruba ta wapa den biento. Nos no a pone atencion riba e oficinanan gubernamental pero a wak bandera blauw strepi geel strea cora cu blanco ta waya aki aya.
Lady Ruth su Dia di Hymno y Bandera a cuminsa den oranan di merdia, un algo pasa di 12 or nan ey na Biblioteca Nacional. Nos como adulto mayor no ta lanta mucho tempran mas mainta y no ta ansha pa nada mas. Nos a yega BNA na ora pa a mira e bunita show di baile di e grupo Dabaruida di Fundacion Rosea Cultural, den cual mi bunita amiganan Marcia Dirks y Madeleine Kelly ta bayla. Un bunita coreografia y den nan bistirnan folklorico cultural cora cu blanco masha masha bunita mes. Nan a bayla tambe e baile di cinta den un forma hopi elegante mes.
Nos a admira e bunita exposicion di mosaic den e sala na banda y a keda impresiona cu e bunita obranan di Dona Oduber y di Enrita Werleman. Nos a cumpra dushi cabaron cu su aros y salada, sinta come ey mes den BNA, despues di a saluda un di e hefenan di Biblioteca, Sra. Zetsia Ponson cu su flor geel bunita asina na su cabey. Despues di a saborea e dushi plato di cabaron, nos a sigui keiro drop in un rato asina na Fort Zoutman na unda cos tawata hopi slow e momento ey cu no mucho hende mas. Djey nos a drop in na ANA banda di aeropuerto y a wak nan exponan andando y tambe un obra teatral di tempo di segunda guerra mundial. Eynan si tawatatin hopi hende. Nos a cumpra y refresca e garganta cu un dushi juice di tamarijn y a laga tumba pa CBPP , yega eynan banda di 3.15 pm.
Akinan tambe nan tawata den un pauze cu no mucho hende pero cu a yena bek den careda di 5 or pm.segun nos a comprende fey Dennis Burke e dinamico presidente di CBPP y cu Lady Ari a recita bunita poemanan banda di 5 pm. Pero nos a sigui nos paranda di Dia Nacional y a bay CBN den careda di 3.45 pm y Lady Ruth a disfruta di algun bunita poema recita pa e.o. Lady Ari ( kemen Ari a recita prome na CBN y djei bai recita na CBPP ) y Dominico Werleman. E ganadora absoluto di un di e festivalnan crioyo di canto, Raquel Lampe a deleita e publico grandi presente cu su cancion super bunita mes ! Raquel a canta “uit volle borst” toca curason di tur presente. Nos a wak e Poeta Clarette Quandus sinta den publico, despues talbes e tambe a recita su bunita poema, pero pa e ora ey ya nos a move djey.
Lady Ruth no kier a paga 10 florin pa un sanger yena sin pan cu e a desea di cumpra, pero a logra cumpra johnny cake cu bakalao den Sta. Cruz na Cede di Mep serca nos dushi hendenan di Haiti.
Ah si, bayendo Noord nos a pasa banda di e fabrica di aloe na Hato. Sta. Cruz tawata nos last stop. All in all nos a pasa un dushi Dia di Hymno y Bandera sin bay den mucho solo. E biaha aki nos no a recita poema na CBPP, pasobra nan tawata den pauze cu tiki hende so. Pero contento di a tende fey Dennis cu Ariana Koolman Chirino si a recita y impacta cu su poema “Aruba mi forsa”. Lady Ari tawata e Reina Poeta di Dia Nacional cu su participacion multifacetico na varios caminda. Ta bon mes tin Poeta cu por tuma nos lugar tambe, dia nos no tey mas. Hobennan adulto crenchi mas jong cu Lady Ruth, cu ta inspira poemanan super bunita mes ! Danki amiga pa a saca cara pa nos tambe ! Nos a wak ariba fb cu bo a enjoy !!! Keep on shining girl !
Pueblo, nos ta spera cu boso tambe a disfruta y goza di nos Dia Nacional cu actividadnan alegre y dushi cuminda crioyo. Pabien na tur grupo cu a marcha den e parada e anja aki ! Specialmente e gruponan scout di Scouting Aruba cu na cabes e gentil cabayero, e dinamico y incansabel HC Chris Lake. Saludos y pabien na e ganadornan di e festival Un Canto pa Aruba !
