Y…alegria nos tawatatin! Sin lubida e parti di sabiduria den dje. Un dushi fin di siman largo tray lomba cu hopi bunita actividad social. Prome nos ta felicita e elenco y ekipo di e actris y actornan den e bunita pelicula ‘E bruha bruha’ di Desiree Croes cu nos a bay wak algun siman pasa, cu a capta nos atencion y curason pa su bunita mensahe pa cuida nos naturalesa pa no caba cu ne y e partinan gracioso pone publico hari cu smak. Tremendo actuacion di e sra grandi di edad sra Yvonne Frans Tromp, e mama di Lelicia y Marisol Tromp , cu ta tambe un tremendo Poeta, y e hoben adulto no mucho mucho jong mas tampoco , esta, Addonsito Croes y Desiree mes cu a duna un tremendo actuacion.
Oh tur a gusta e parti di Nigel Maduro, e indjan. Nos no por lubida e rumannan di Desiree, esta, Yolanda y Ruben. Pabien na tur cu un manera of otro tin algo di haber cu e pelicula local aki. Nos hendenan tambe por ! Nos kier a felicita tambe tur e condecoradonan di e anja aki 2025, cu nan lintje of ridder in de Orde van Oranje Nassau. Un pabien special na sr. Amado E. Rosina di nos dushi bario di Dakota tur dia cu su condecoracion super bon mereci pa tur locual e ta hasi e.o. pa nos hobennan riba tereno di deporte y musica. E anja aki tawatatin un dushi sorpresa pa tur esnan cu a yega di wordo condecora den pasado te cu awe cu un dushi y bunita celebracion Oranjeviering den Marriott Hotel su ball room cu un bunita speech di Gobernador Alfonso Boekhoudt, cu Lady Ruth conose tempo di atendencia na e Iglesia Faith Revival Center.
Nos Gobernador ta un homber di hopi fe, y nos por corda nos bishita na Hulanda tempo e tawata ministro plenipotenciario y nos a bay entrega buki di poema na su persona y a nota un potret masha bunita di e y su famia grandi di 9 yui. Lady Ruth cu no ta verlegen a puntra si tur e yuinan ta di e mesun sra.y su contesta positivo a confirma nos cu ainda tin hendenan super fiel na otro. Nos Gobernador Alfonso y su bunita sra esposa Hanneke ta hopi bendiciona ! Un bunita gesto pa a trese tur e condecoradonan hunto pa e Oranjeviering di e anja aki sigur ta algo di aprecia ! Y asina nos tres cu nos lintje pega riba nos panja, mi tata Lucas Bergen, mi esposo Johan y ami a bay hunto, Papa cu su 92 anja di edad, a goza topando cu hendenan cu nos tin algun tempo sin mira.
Un momento crioyo espontaneo ora ful ful e grupo di condecoradonan a bay pose hunto cu Gobernador pa un groepsfoto. Varios den nan rolstoel y of cu rollator a sinta dilanti, y esnan cu no por a para mucho largo tambe a sinta , mientras tur e otronan a para patras of na banda. Tawata reina un dushi ambiente cu den fondo e flamante artista cantante Stephanie Albertus, cu a caricia nos oido y curason cu e.o. e cantica Besame mucho.
Tremendo bos ! E tokenan clasico a cay na bon bon tera cu snacknan unico super dushi e.o. e cabaron apart cu algo dushi di bebe. Esnan cu a spera riba beef cut small of chicken cut small of pastechi a dal nan dede ! Tawata un celebracion den style sin mucho protocol. E parti na cuminsamento cu e dos hymnonan a cana nechi y elegante. Den su speech Gobernador a menciona un crenchi di tur locual Titi Tromp di 99 of ta 98 anja di edad, presente den e ballroom, a hasi den su bida largo. Ki bunita momento !
Ta ken no kier biba largo , anto den bon condicion y cu un trayectoria grandi bo tras di tur locual bo a hasi y duna bo comunidad como un boluntario ?Nos ta conclui nos relato, deseando nos bunita amiga tremendo cantante di jazz Osdaylies exito cu su bunita canto di jazz den e anochi di Jazz dia 30 di April venidero dilanti e pleinchi di Kulture Café na San Nicolas. Un paharito a bisa nos cu lieve Osdaylies lo canta un bunita cantica di Izalin Calister. For di awe caba un dushi dia liber na tur nos obreronan riba nan dia 1 di Mei . Danki pa lesa nos relato. Un bearhug di Lady Ruth !
