Sabiduria sin santidad ta terenal, e no ta bini di Dios, pasobra sabiduria di Dios, ta cambia bida di hende y ta forma nos mas como disipulo di Cristo Hesus.
E competencia di sabiduria cu tin actualmente ta hopi notabel, pero e palabra ta bisa hopi cla den Hebreonan 12:14 y sin pas y sin santidad ningun hende lo no mira Dios.
Di berdad cu nos tur mester conoce e palabra , pa somete nos mes na Dios y para firme contra e plannan di diabel, pero un cos tur hende mester corda:
Cu ora nos yega dilanti di Dios, e no ta bay puntra e nomber di e Universidad Biblico cu bo a caba, ni tampoco e titulo cu bo tin, lo no ta bay tin separacion segun yamada, pero lo tin reconocimento di e sirbido, pasobra Senjor mes lo bisa” Bon bini siervo fiel”, pasa pa dilanti, y na esnan cu no haci Su Boluntad lo e bisa: Bay for di mi pasobra mi no conoce bo”.
No lubida locual tin para scirbi den Colosensenan 3:23-24-25, pasobra Dios no ta haci distincion di persona.
Hesus a bisa pa nos bay den henter e mundo pa hiba su palabra, awor pa un hende hiba palabra, e mester conoce e palabra , pasobra ningun hende no por duna locual cu e no tin.
Tene cuidao pa bo conocemento biblico no haci bo orguyoso y arogante, haci un persona estilo fariseo cu ta pensa cu bo ta mas cu otro hende( Lucas 18:9-14), pasobra conocemento sin amor, y sin santidad no ta probecha hende di nada.
Laga nos corda cu Cristo Hesus tabata amigo di tur hende pa asina e por a yega na tur hende su curason, hasta riba leproso e tabata pone Su man , pa medio di su compasion y misericordia.
Ora nos tin sabiduria di Dios nos no por sinti nos mes mas cu otro hende , e palabra di Dios ta bisa lo sigiuente: Laga e mustra door di su bon conducta su obranan den suavidad di sabiduria.
Esey ta nifica cu bo no por ta sabi spiritualmente ( conocemento biblico) y e ainda tin mal comportacion, rabia, envidia y jaloersheid ta goberna bo curason.
Romanonan 3:23 ta para scirbi: Pasobra tur a peca y ta falta e gloria di Dios.
Esey ta berdad, pero no lubida, kico 2 Corintionan 5:17 ta sinja nos.
Tur caminda bo ta tende cu hende no ta perfecto, aunke esey no ta para scirbi letter pa letter den Bijbel, y Pablo ta bisa esey den Filipensenan 3:12-16.
Y no laga nos lubida locual e palabra di Dios ta bisa den Mateo 5:48. Romanonan 6;14-15, y Hebreonan 10:26-27.
Hopi biaha ora nos ripiti algo cu no ta para scirbi e ta habri porta pa pica: por ehempel hende cu conoce Dios, ta sigi, bebe ,huma y droga scondi, sigi biba den adulterio, bao di e capa cu e no ta perfecto.
No ta boluntad di Dios pa nos cana halsa hende, den un competencia ken sa mas, pero pa nos halsa e nomber di Dios tur caminda cu nos bay, pasobra ningun hende no por wordo sana den nomber di hende, tampoco ningun demonjo ta sali pa medio di nomber hende.
E nomber riba tur nomber ta e nomber di Esun cu a muri na crus pa nos tur, e nomber cu tin poder, pa sana tur enfermedad, trece liberacion, y mas cu tur cos tin e poder pa salba y duna bida eterna.
E sabiduria di Dios ta puro, pacifico, yen di misericordia,sin hipocrecia,suave y yen di amor.
Sinceramente, Pastor Marcel Balootje
