Mi dushi hendenan, bon dia yen di sabiduria den nos alegria ! Nos relato di awe ta abstracto cu potretnan bunita di algun di nos dushi hendenan cu den un of otro forma ta competiendo cu otro den e arena politico, pero ta keda prohimo ruman cu respet pa otro., e.o. algun di e lidernan di RAIZ, den cual tin 5 damas bon studia y capacita cu e deseo pa duna nan granito den Parlamento : Kinsasha, Marisabelle, Anouk, Raymicheline “Misha” y Twyma .
Nos a atende un interesante actividad di nan den curason di Koyari dedica na nan como hende muhe. Tur 5 a hiba palabra y segun Lady Ruth por hasi algo bunita pa Aruba. Eynan nos a bay cu un poema skirbi algun tempo atras pero cu su balor ketobay y a hanja e oportunidad pa a recitele y a entregele na Misha. Hopi hende sa cu Lady Ruth ta apoya nos hendenan muhe den tur area, no unicamente profesional pero tambe nos amanan di cas.
Por corda ainda un poema di pabien y exito dirigi na e profesional Evelyn dia ela asumi e puesto importante di Prome Ministro, prome dama den historia na Aruba cu a bira Prome Ministro. Mi curason di Poeta ta sigui dirigimi y a dirigimi pa un otro bunita poema pa Evelyn, locual nos mes a aserka su persona via facebook, pidi permiso pa nos recit’e. na e anochi fabuloso di Arte, binja y keeshi den curason di Piedra Plat.
Tin biaha nos ta wordo invita y pidi pa nos skirbi un of otro poema pa un of otro persona den nos comunidad y tin biaha nos ta inspira algo bunita libremente di nos humilde curason y nos mes ta pidi si por recit’e. Boso sa cu Lady Ruth ta gusta skirbi y recita poema pa tur ocacion sin cobra niun cent. Nos ta usa nos talentonan ricibi di Creador di Amor. Ah si ! Nos tawata den programa radial serca “ Cu Astrid bisa’mi” na Mega 88 FM., Astrid di e partido berde y nos a combersa di arte den un forma hopi agradabel.
Dos siman despues nos a bay combersa cu Astrid tocante nos grandinan cu hopi amor. Algun dia despues, nos a sinta den veranda Shon Johan combersa cu meneer di scol casi 25 anja caba, Ainsley, di e partido oranjo ora e tawata den nos bario di Dakota cu su grupo y a pidi permiso pa papia cu mi. E tambe tin e energia, amor y capacidad pa traha pa Aruba si e hanja e oportunidad. Y last but not least, nos a atende e dushi “Art Wine and Cheese” Fundraising di nos flamante ministro presidente Evelyn na Piedra Plat Entertainment Center cu tawata exitoso y cu dushi ambiente di Tracy Alders riba su viool y cello y tambe cu e super dushi musica di Grupo di Betico.
Sandra a canta hopi great mes ! Nos tambe a los e pianan y heupnan un crenchi ! Tur cu Lady Ruth a menciona y mas ta hendenan bon studia, capacita cu amor pa Aruba. Tur tin deseo di drenta e arena politico, of ja tawata den e arena aki caba un of mas biaha. Tin algun nobato y tin un of mas cu mas experiencia. Esun cu tin hopi experiencia y a traha bon durante su anjanan den gobierno y a representa nos como hende muhe super bon mes ta Evelyn di MEP. Lady Ruth, e Poeta di Aruba ta respeta, aprecia y stima nan tur. Oh ki bunita ta e obranan pinta basha a la Dutch Pouring di Evelyn, e sra esposa,mama ,wela y artista dinamico cu hopi energia aki cu mester comparti su tempo den asina hopi, demonstrando cu e por . Lady Ruth a topa Liz y Maiky, mayornan di amiga colega Poeta Marilis Becker atrobe, e biaha aki na e Actividad di Arte Binja y Keeshi pa recauda fondo pa e campanja di Evelyn den su Movecion. Biaha pasa nos a topa nan na Café The Plaza.( mi ta sorpresa nan cu e pic saca eynan). Manera mi a expresa na un amiga, ohala tawatatin un lista cu tur e hendenan cu Lady Ruth stima y conose y sa cu nan por sinya goberna y of bolbe hasi un bon trabao den gobierno hunto. E biaha aki, nos ta dispuesto di scucha tur y bishita un of otro actividad di nan pa hasi conosi y pa hasi algun pregunta cu kizas ta wordo hasi na nan caba dor di pueblo. Preguntanan tocante “Nos grandinan”. Pa tin bon atencion y servicio pa nan, specialmente na nan cu no por yuda nan mes asina bon mas y cu tin’e dificil na cas. Shonnan, nos papel A-4 a yena ! Danki pa boso atencion ! Un “bearhug” di Ruthy.
No ta facil
Ser muhe den un funcion halto ta possibel awendia
Pero e retonan ta keda dificil tin biaha y complica
Pero asina mes cu no ta facil, e hende muhe Evelyn
a demonstra cu e por enfrenta y surpasa
Su amor di mama den dje
A demonstra na dje
Cu nos isla ta aprecie, stime y sinya di dje
Un hende muhe cu ta traha
Y cu ainda no ta cla pa baha
Dia 6 di december vos di pueblo lo papia y dicidi
Kiko nos Aruba por spera y ricibi
Movecion den direccionnan di biento
Movecionnan riba olanan di laman
Shonnan, locual lo ta e resultado
Ban sigui ta prohimo ruman
Y duna un man cu curason
Pa Aruba sigui ta un bendicion
Danki pa tur bon trabau hasi te awor
Y cu Creador sigui rondona nos dushi isla y su gobernantenan cu sabiduria y amor
Ruthy “Lady Ruth”
November 2024
