Ingeniero Ernst Muller a asembla torpedo pa submarinonan. For di cada dies torpedo tabatin “defecto” – angula di detonador robes. Visto solamente na explosion. Durante dos aña el a sabotia 87 torpedo. Nan a faya pa explota raca e punterianan.. Su coleganan a alaba “Calidad Aleman”. Admiralnan tabata asombra..di con asina hopi fayo. Ernst a keda keto y a continua “haci eror”. Nan a gar’e despues di dismantelando torpedo sin explota y encontrando marca – raspá chikito den forma di cruz. Su firma. Luna tortura demandando nombernan di complice. El a bisa: “A traha so. Eror tambe ta arma”. Ehecuta 19 di februari 1945. Su “defecto” a salba 12 barco mercantil cu 3000 marinero abordo. Despues di guera, Naval Britancio a analisa su patronchi – precision matematico den caos. Tin ora inexacto ta scapa mas preciso cu cualkier tiro.
E articulo ariba, mi a traduci for di un articulo (encera) cu mi a ricibi for di mi amigo y colega, na Florida, Sr. Gerrit Walter, cu ta splica di un ingeniero Ernst Muller cu tabata asembla torpedo pa submarinonan, pero tabata sabotia nan pa nan no explota. Pa mi e storia aki ta hopi importante pa motibo cu aki na Aruba nos por corda cu Capitan Werner Hartenstein, despues di tur e disasternan riba e tankeronan dilanti Lago, a bay Eagle y a lansa tres torpedo riba e barco Mericano Arkansas mara na waf di Eagle. Un torpedo a dal e barco pero sin mucho daño, uno a bay den fondo di lama, segun e logbook di guera di Hartenstein, e no a explota. E ultimo a bay termina riba beach di Eagle tambe sin a explota. Mi a hasta scirbi y publica e buki E incidente di e torpedo na Eagle Beach, Aruba cu ta duna tur detayes riba e incidente aki.
E articulo interesante aki ta duna nos un pista di con e torpedo cu a bay den fondo di lama, no a explota. Di con esun cu a subi beach na Eagle Beach tampoco a explota y ni ora cu e mariniernan Hulandes a busca di explote poniendo un dinamiet bou di dje. Ta te ora cu nan a mara un cabuya pa ranca e cabes di e torpedo, di ripiente el a explota, causando morto di e mariniernan Hulandes, De Maagd, Joose, Kooijman y Vogelenzang. Tambe heridando tres schutter local, Srs. Klein, Jacobo Kock y Bruno Bremer.
Otro posibel prueba tambe ta cu dia 16 di februari 1942, e submarino Aleman U-67 a lansa tres torpedo riba e barco MS Rafaela na Corsou. Un di e torpedonan aki a bay termina riba rif sin explota. Pa su mañan nan a dismantele. Esaki tambe por ta un torpedo sabotia pa Ernst Muller?
Mi a traduci e articulo y mi ta encera e original (na Ingles) pa nos tur mira cu hasta nan a usa e potret di e torpedo na Eagle Beach unda Comandante G.H. v/d Spek y e militar Mericano Robert Bruskin ta inspeccionando e torpedo. Pa finalisa, mi opinion ta cu e articulo aki ta duna nos un pista cu muy probable e dos submarinonan aki, U-156 y U-67 tabatin torpedo sabotia pa Ernst Muller. Mi a bay den nan website y loke mi a encontra ta cosnan increiblemente cu a pasa.
Ami cu Gerrit Walter tin hopi bon contacto cu Alemania unda cu ami ta ricibi bon cooperacion den mi investigacionnan y hasta video. Nos por corda cu aki na Aruba tabata ser menciona cu e capitan di U-156, Sr. Werner Hartenstein tabata biba na Aruba y traha na Powerhouse di Lago. Hari nan a hari mi ora mi a puntra nan. Nunca e no a biba afo di Alemania. E unico sobreviviente di e famia Hartenstein actualmente aki ta un sobrina, pero pa privacidad mi no por divulga su nomber.
Pronto mi ta bin cu mas informacion interesante riba e Di Dos Guera Mundial. Keda pendiente.
