Pasobra Dios a stima mundo asina tanto , cu E a duna Su Yiu unigenito, pa ken cu kere den dj’E no bay perdi ma tin bida eterna.( Juan 3;16).
Y nos ta hanja conformacion di esaki den Hechonan 4:12 caminda ta para scirbi:No tin salbacion den ningun otro, pasobra no tin bao di cielo ningun otro nomber cu ta wordo duna na hende, pa medio di cual nos mester wordo salba.
Cristo Hesus ta compronde perfectamente locual nos ta pasando aden.
Cristo Hesus ta haci lo imposibel, bira posibel, no ta importa e situacion cu nos ta den.
Solamente pa medio di Cristo Hesus nos por wordo salba.
Esun cu no kere den Cristo Hesus pa salbacion, ta biba bao di condenacion ( Juan 3;18) y den e estado ey e no por hereda bida eterna.No laga ningun hende ganja bo, ni tampoco no ganja bo mes.
Cielo tin un porta y pa drenta aden nos tur mester drenta pa medio di Cristo Hesus , kende ta E porta.
Pa nos por cana riba cayanan di oro den cielo, nos mester pasa den e porta y caminda smal cu ta den Cristo Hesus, y asina nos por cana den caya hancho den cielo, pesey hopi ta scohe e caminda hancho di mundo y ta rechasa e caminda smal di nos Senjor Cristo Hesus.
Un hende no por ricibi nada, si esey no a wordo duna na dje for di cielo. ( Juan 3;27).
Bijbel ta sinja nos cu Cristo Hesus ta e caminda di Berdad y e bida, ningun hende por yega serca e Tata si no ta pa medio di Cristo Hesus, esey ta nifica, cu tur hende cu no tin Cristo como prioridad den nan bida , ta imposibel pa ricibi bida eterna y asina tin cielo como destinacion final.
Ta hopi trampa diabel tin pa convence hende, cu nan ta mucho jong . Gosa un tiki mas di bida, of placa , propiedad y cosnan di mundo ta mas importante cu salbacion, cu salbacion no tin pura, pa asina wanta hende den scuridad, pasobra tur hende sa e plan di e malbado cual ta para scirbi den Juan 10;10.
Scuridad kier cubri mundo henter, y nos tur ta mira esey, pero te ainda hende no kier compronde e salida for di gara di diabel, cu solamente Dios a ofrece na mundo henter pa tur cu kere den Su Yiu unigenito no bay perdi ma ta ricibi bida eterna.
E preis cu Cristo Hesus a paga pa nos salbacion na e crus riba Calvario, no ta nada cu ningun hende por haci pa nos, pasobra pa medio di su morto e a redemi nos for di pica, y a pone nos riba e camimda di berdad y bida.
Ta tempo pa tur hende arepenti, y stop di haci cabesura, stop di play sabi, stop di hunga religioso, pasobra Cristo Hesus ta Rey y Senjor den bida di tur esnan cu ta kere den dj’E.
Dios a ofrece salbacion na nos tur, no ta existi salbacion temporal, salbacion ta hiba nan bida eterno. No ta existi un temporada di puresa, puresa ta prioridad den nos bida, pa completa nos salbacion den Cristo Hesus.
Cristo Hesus ta mescos cu e sanger cu ta corre den nos curpa, awel pensa bon, ken por biba un temporada sin sanger, y despues e ta bin bek bin busca sanger?
Asina nos tin cu comprende e prioridad di salbacion den nos bida, cu ta necesario arepenti y aparta for di pica y biba pa Cristo Hesus.
Sinceramente, Pastor Marcel Balootje
