Si no tabata asina, Dios lo no a manda Su yiu unigenito pa ken cu kere den dj’E no bay bay perdi ma tin bida eterno.
Efesionan 2:8-9 ta para scirbi: Pasobra pa medio di gracia boso ta salba door di Fe, y esey no di boso mes, e ta don di Dios,no como resultado di obranan, pa ni un hende no por gaba.
Salbacion ta un regalo di Dios, y nos tur tin cu comprende cu un regalo ta gratis, bo no a traha pe, pasobra e preis di salbacion ta Cristo Hesus a paga pe na crus,ningun hende no por gana salbacion ni traha pa salbacion.
Pero e ta un necesidad pa tur hende, pasobra e palabra di Dios ta bisa, esun cu kere lo salba , ma esun cu no kere lo ta condena, pasobra e no a kere den e Yiu unigenito di Dios.
Hesus a splica Nicodemo bon cla cu esun cu no nace di nobo e no por mira e reino di Dios.(Juan 3:3).
Den Juan 3:5 Hesus ta bolbe contesta y bisa, di berdad, di berdad mi ta bisa bo, si un hende no nace di awa y di e spirito, e no por drenta e reino di Dios.
Den e bida aki nos tur mester acepta Cristo Hesus como nos Senjor y Salbador, pasobra Cristo Hesus ta e caminda, e berdad y e bida, ni un hende por yega serca e Tata sino ta pa medio di dj’E.
Henter famia mester entrega nan bida na Cristo, pasobra ta para scirbi cu tur rudia lo dobla, y tur lenga mester confesa cu Cristo ta Senjor pa gloria di Dios Tata.
Esaki no ta asunto di religion, pasobra salbacion ta personal pa cada un di nos, pasobra e palabra di Dios ta bisa den Romanonan 10:9, cu si bo confesa cu bo boca Hesus como Senjor y kere den bo curason cu Dios a lant’E for di mortonan lo bo ta salba, pasobra cu curason hende ta kere pa hanja husticia, y cu boca e ta confesa pa hanja pa hanja salbacion.
Si bo tin un amigo cu no ta hanja cu salbacion ta necesario, haci hopi oracion pe asina e entrega su bida na Cristo Hesus, pasobra no tin speransa pa esnan cu no ta reconoce Cristo Hesus como Senjor y Salbador.
Dios mes a bisa den su palabra cu esun cu no a kere su Yiu unigenito cual ta Cristo Hesus,lo bay perdi, pasobra nan no a kere den Su Yiu, y nan lo cay bao di condenacion, pasobra Dios a stima mundo y a manda Su unico Yiu y nan a prefera di stima scuridad,y no E lus.
Cristo Hesus no a bini pa condena e mundo pero pa e mundu wordo salba door di dj’E.
Awor mas cu nunca nos ta mira e necesidad di salbacion den henter e mundo, tur e senjalnan ta mustra den direccion den e binida di Cristo Hesus pa busca tur esnan cu a kere den dje y a perservera wardadando su binida.( Mateo 24:13).
No lubida locual ta para scirbi den Juan 3:36 : Esun cu kere den e Yiu tin bida eterno,ma esun cu no obedece e Yiu lo no mira bida, ma e furia di Dios lo keda riba dje.
Si awe bo lesa of scucha e palabra di Dios, no haci bo curason duro, no rechasa bo salbacion, pasobra no tin otro Salbador cu no ta nos Senjor Cristo Hesus.
Entrega bo bida awe.
Sinceramente, Pastor Marcel Balootje
