Pesey si un hende ta den Cristo , ta un criatura nobo e ta, e cosnan bieu a pasa, ata tur cos a bira nobo.( 2 Corintionan 5:17).
E ora ey Senjor a bisa Cain, Pakico bo ta rabia? Y pakico bo cara ta sera asina?Si bo a haci bon, lo bo no wordo acepta?, Y si bo,no haci bon, pica ta loer na porta, Y su deseo ta pa bo, ma abo mester domine.( Genesis 4-6-7).
Husa boso sano huicio y stop di haci pica,pasobra algun no tin conocemento di Dios. Mi ta bisa esaki pa brongosa boso.( 1 Corintionan 15:34).
Pesey no permiti pica reina den boso curpa mortal, asina cu boso mester obedece su pasionnan. No sigi presenta e miembronan di boso curpa na pica,como instrumento di inhusticia,ma presenta boso mes na Dios como esnan bibo for di e mortonan y boso miembronan como instrumento di husticia pa Dios, Pasobra pica lo no tin dominio riba boso. Pasobra boso no ta bao di ley , ma bao di gracia.( Romanonan 6:12-14).
Gracia ta bini di Dios, gracia ta un fabor no mereci, pero no laga nos husa gracia, como escudo pa biba den libertinahe,haciendo tur sorto di cos cu no ta cumbini, y corda cu Hesus a bisa cu esun cu perservera te na fin , esey lo ta salba.
Pesey awor no tin condenacion pa esnan cu ta den Cristo Hesus.Pasobra e ley di e Spirito di bida den Cristo Hesus a haci mi liber di e ley di pica y di morto.( Romanonan 8:1-2).
Ora un hende kere den Cristo Hesus manera para scirbi den Juan 3:16 e hende aki ta ricibi bida eterno, ma si un hende no ta kere den Cristo Hesus e ta cay bao di condenacion manera Juan 3:17-18 ta bisa.
Mescos cu ora nos ta den Cristo Hesus nos no por sigi biba segun e bida bieu, cu su custumber y pasionnan di malicia y inmoralidad esey ta imposibel pasobra nos tin bida nobo den Cristo.
Pesey ta un locura ora un hende ta bisa ami ta sirbi Dios manera mi kier, of tur hende tin nan Dios, esey ta manera di no acepta coreccion y sigi den scuridad.
Pasobra E a libra nos di poder di scuridad, y a traslada nos pa e reino di Su Yiu stima, den kende nos tin redencion y pordon di picanan.( Colosensenan 1:12-14).
Pesey considera e miembronan di boso curpa terenal ,como morto pa inmoralidad, impuresa,pasion, deseo malo y golosidad, cu ta igual na idolatria, pasobra ta pa motibo di e cosnan aki cu e furia di Dios, lo bin riba yuinan di desobedencia.( Colosensenan 3:5).
Ken ta un yiu di desobedencia? Esey ta un yiu cu sa locual su tata a bise, pero e ta dicidi di haci net contrali di e palabra di su tata.
Awendia nos ta bibando un tempo hopi scur aunke nos ta rondona cu lus tur caminda, pero locual cu nos ta confronta, ta cu scuridad a drenta curason di hende, y hende ta obra segun locual tin den nan curason, pasobra manera ta para scirbi: For di curason ta sali maldad, malicia, adulterio, matamemento, furia, rabia, griteria, infieldad, intriga,palabra malo, inmoralidad, inhusticia, traicion y otro sorto di inikidad.
Hende ta scohe pa haci pica, door di sigi nan mes curason, pasobra Dios no ta tenta ningun hende, pero hende ta asocia cu scuridad, pensando riba material y paranda, y ta lubida e caminda berdadero di Dios.
No laga pica domina bo bida, pone Cristo Hesus na prome lugar.
Sinceramente, Pastor Marcel Balootje
