PPA a bisa cla y raspa cu den cuadro di reduccion di gastonan di gobierno cu mester bay hinca fondonan adicional pa medio di contribucion di gobierno den salud di nos pueblo. PPA ta contra e cobramento di eigenbijdrage manera ta hinca den e Landspakket, nan no lo acepta esaki den un proximo gobierno. Esakinan ta palabranan di Otmar Oduber papiando riba un di e tres partinan central di nan plan a largo plaso Nos Aruba 2025-2050, salubridad.
PPA ta di opinion cu salubridad publico tin cu bira competitivo, ta habri mercado di e region pa por duna servicio, pa por duna e medicinanan na Aruba, pa por duna e salud cu ta buscando. Ta mandando rond di 38 miyon Dollar den exterior pasobra ki ora un persona bira malo e ta wordo manda Colombia of den region, pero no por laga dokternan di e mesun regionnan bin Aruba pasobra ta bisa cu nan no tin e BIG registratie. Realidad di bida ta cu mester habri porta, permiti competencia, permiti pa e ciudadano haya cuido medico di calidad. No por ta asina cu ciudadanonan mester warda lunanan largo pa por haya afpraak cu specialistanan, si tin cu habri mercado pa dokternan di region bin, of servicio wordo duna, esaki mester tuma luga. Gobierno mester percura pa haya e fondonan disponibel y esaki lo wordo haci door di reduccionnan den gastonan di gobierno, cual ta un otro parti esencial den Plan Nos Aruba 2025-2050.
