Wak cuanto violencia tin rond di nos, wak cuanto hoben ta bringa y hasta mata, con nan ta planea,
Pa haci malo cu otro, y hasta graba pa asina nan tin prueba di nan maldad.
Tin hopi cos premedita ta tumando lugar, y ta parce manera ningun hende no ta tene cuenta con leu amargura a penetra den curason.
Hopi hoben ta amarga door di e situacion cu nan ta biba of a biba den nan cas mirando violencia, scuchando ofensa, falta di respet y tambe falta di e palabra di Dios.
Amargura tin su rais, e ta un herida cu no a cura, un dolor cu no a bay, un falta di pordon, un rabia, un odio. Un envidia diabolico.
No keda stranjo ora den un cas di famia amargura ta presenta y ta contamina henter e hogar.
Bo por sconde amargura, pero ta yega e momento cu e ta presenta su mes,pasobra e no tin respet.
Di e forma aki bo por reconoce ora tin amargura den bo curason: Chek bo mes bon.
.
Ora bo no por soporta crecemento di bo prohimo.
Ora bo no por celebra victoria di bo prohimo.
Ora bo husa tur excuus pa bo no pordona.
Ora bo ta papia hopi palabra malo y bo no tin respet,
Ora rabia ta domina bo, y bo kier bringa constantemente.( Efesionan 4:31).
Ora bo ta busca tur manera pa papia malo di hende, y asina sacia bo set.
Ora bo sa cu bo ta ofende hende, pero toch bo ta sigi papia, sigi haci danjo.
Ora bo ta ganja y inventa pa hala atencion di hende riba bo.
Ora bo ta wak solamente bo propio interes y no ta tene cuenta cu otro.
Ora malicia ta domina bo curason.
Ora bo ta discrimina.
Amargura tin su rais, e ta manera un mata, pero e ta un pica, no tin therapia contra amargura, amargura mester wordo confesa y kibra sino e ta sigi crece y bira un mata grandi cu rais profundo den bo curason.
Tin hopi hende cu ta sera den prison pa motibo di amargura.
Tin hopi hoben cu ta perdiendo nan futuro pa motibo di amargura.
E cos cu ta wanta e hobennan hunto pa cana haci malo ta amargura.
Amargura ta pone bo ripiti mesun delito, pasobra bo no a confesa.
For di chiki e hoben su curason ta herida, pasobra e a mira su mama wordo maltrata of su tata wordo maltrata sin por a haci nada.
Amargura ta consecuencia di violencia domestico, y palabra ofensivo..
Amargura ta contagioso, pasobra den un cas caminda tin violencia, rabia, odio. Tur hende ta bira amarga,
Tin hende ta apoya amargura , sin sa kico nan ta haci, pasobra ora bo apoya maldad e ta crece y bin bek pa bo mes.
Ta increibel con tin hende ta apoya nan yiu, sabiendo cu e ta cana cu arma.
Ta increibel con por tin hende ta apoya nan yiu pa bringa, pero nan sa masha bon cu esey no ta bon.
Amargura ta pasa over di mayor pa yiu, te ora e yega un caminda cu e no por wordo controla y ta bira un berguesa pa famia.
Ora un mucha ta bisa den un tono violento, sin cuenta, cu hopi vulgaridad, cu e a sali su mama of su tata ya eynan bo por saca afo con amargura a drenta.
Mira pa ningun hende, no keda sin alcansa e gracia di Dios, pa ningun rais di amargura no spruit y causa problema y door di esaki hopi wordo contamina.( Hebreonan 12:15
Sinceramente, Pastor Marcel Balootje
